ބިންވެރިޔާ ސްކީމުގެ ދަށުން އުސޫލާ ހިލާފަށް ގެވަޅު ދޫކުރި މައްސަލާގައި އެޗްޑީސީގެ 15 މުއައްޒަފަކު ވަޒީފާއިން ވަކިކޮށްފިއެވެ.
ވޮއިސްއަށް މައުލޫމާތު ލިބިފައިވާ ގޮތުގައި އެޗްޑީސީން ވަކިކުރި މުއައްޒަފުންގެ ތެރޭގައި މީގެކުރިން ގެވަޅު މައްސަލާގައި ސަސްޕެންޑްކޮށްފައިވާ އެކުންފުނީގެ ސީނިއާ މުއައްޒަފުންވެސް ހިމެނެއެވެ. މައްސަލާގައި ސަސްޕެންޑްކޮށްފައިވަނީ އައިޓީ ކޮންސަލްޓެންޓް އަބްދުالله ޝުހޫދާއި ޗީފް ފައިނޭންޝަލް އޮފިސަރު އަބްދުالله ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން އަދި ރިއަލްއެސްޓޭޓް ޑެޕިއުޓީ ޑިރެކްޓަރު އަހުމަދު އައިމަން އެވެ.
ބިންވެރިޔާ ސްކީމުގެ އުސޫލާ ހިލާފަށް އެޗްޑީސީގެ ކުރީގެ މެނޭޖިންގ ޑިރެކްޓަރު ފަޒުލް ރަޝީދުގެ ބޭބެއަށް ގެވަޅު ދިން މައްސަލައިގެ ޖިނާއީ ތަހުގީގެއް ފުލުހުން މިހާރު ވަނީ ފަށާފައެވެ.
މި މައްސަލާގައި ފަޒުލް ރަޝީދު އިސްތިއުފާދެއްވާފައިވާއިރު، 20 މީހެއްގެ ޕާސްޕޯޓްވެސް ވަނީ ހިފަހައްޓާފައެވެ. ލިސްޓުގައި ނެތީސް ގޯތި ދިން މައްސަލާގައި، އެޗްޑީސީގެ ބޯޑުގެ ޗެއަރމަން ފިޔަވައި، އެހެން ހުރިހާ މެންބަރުންވެސް ވަނީ ތަޙްްޤީޤު ނިމެންދެން ސަސްޕެންޑް ކޮށްފައެވެ.
ސަރުކާރުން މިހާރު ވަނީ އެޗްޑީސީގެ މެނޭޖިންގ ޑިރެކްޓަރުކަމުގެ މަގާމަށް އައު ބޭފުޅަކު އައްޔަނުކޮށްފައެވެ. ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރުގެ މަގާމަށް އައްޔަނުކޮށްފައިވަނީ، މ. ދޫރެސް، މުހައްމަދު މައުރޫފެވެ. އޭނާ އާ ބެހޭގޮތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ، މައުރޫފާ މެދު ފުރިހަމަ ޔަގީންކަން އެބައޮތްކަމަށެވެ.
Advertisement
This content is created and paid for by advertisers and does not involve Voice Journalists
