އެޗްޑީސީގެ ތެރޭގައި އެކުންފުނީގެ މެނޭޖިންގ ޑިރެކްޓަރު ފަޒުލް ރަޝީދު އުސޫލާ ހިލާފަށް ކަންކަން ކުރައްވާތީ އެކަމުގެ ޝަކުވާ ހިމެނޭ ސިޓީއެއް ލިބިވަޑައި ނުގަންނަވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެޗްޑީސީގެ ތެރޭގައި ހިނގާދިޔަ ހިޔާނާތާ ގުޅޭގޮތުން ކުރީގެ އެތަނުގެ ޗެއާމަން އަހުމަދު ޒުހޫރު، ރައީސުލްޖުމްހޫރިއްޔާއަށް މީގެ ފަސްމަސް ދުވަސްކުރިން ސިޓީފުޅެއް ފޮނުއްވިތޯ ނޫސްވެރިޔަކު މިއަދު ކުރި ސުވާލަކަށް ޖަވާބުދެއްވަމުން ރައީސް ޑރ.މުއިއްޒު ވިދާޅުވީ، އެ ފާހަގަކުރާ ސިޓީއެއް އެމަނިކުފާނަށް ލިބިވަޑައި ނުގަންނަވާކަމަށެވެ.
ރައީސުލްޖުމްހޫރިއްޔާގެ އޮފީސް ދޮރުމަތީ ހުންނަވައިގެން ނޫސްވެރިންނާ ވާހަކަފުޅު ދައް2ކަވަމުން ރައީސް މުއިއްޒު ވިދާޅުވީ އެފަދަ ސިޓީއެއް ލިބިވަޑައިގެންނެވިނަމަ، އެކަން ބަލައި އަޅުއްވަންޖެހޭ ފިޔަވަޅުތައް އެޅުއްވީސް ކަމަށެވެ.
ކޮރަޕްޝަން ނުވަތަ ޤަވާއިދާ ހިލާފަށް ކުރާ އެއްވެސް ކަމެއް ހުއްޓުވުމަށް އަޅުގަނޑު ފަހަތަކަށް ނުޖެހޭނަން.
ރައީސް ޑރ.މުއިއްޒު ވިދާޅުވިއެވެ
ރައީސް ވިދާޅުވީ ކޮރަޕްޝަނާއި އުސޫލުން ބޭރުން ކަންކަން ކުރެެއްވުމުގެ ފުރުސަތު އެއްވެސް ފަރާތަކަށް ނުދެއްވާނޭކަމަށެވެ. މިގޮތުން މިފަދަ ކަންކަމުގައި މީގެ ކުރިންވެސް ކަމާބެހޭ ފަރާތްތަކަށް ދަންނަވައިގެން ފިޔަަވަޅުތައް އަޅާފައިވާކަމަށެވެ. ރައީސް ވިދާޅުވީ އެމަނިކުފާނު ބޭނުންވަނީ މި ސަރުކާރަކީ ކޮރަޕްޝަނާ ފަސާދައާއި ޤާނޫނާއި ޤަވާއިދުން ބޭރުން ކަންކަން ކުރުމުގައި ދުރުވެފައި އޮތް ސަރުކާރަކަށް ވުންކަމަށެވެ. ރައްޔިތުންނަށް ވީ ވައުދަކީވެސް އެއީކަމަށް ރައީސް ޑރ.މުއިއްޒު ވިދާޅުވިއެވެ.
ރައީސް ވިދާޅުވީ ސިޓީއެއް އެމަނިކުފާނަށް ފޮނުއްވައި، އެއަށް އަމަލުކޮށްފައިނުވާކަމަށް ދެކެވެމުންދާ ވާހަކަތަކަކީ ކަނޑައެޅިގެން ދޮގު ވާހަކަތަކެއް ކަމަށެވެ. ރައީސް ވިދާޅުވީ އެމަނިކުފާނަށް ކަންކަން އެނގިވަޑައިގެންނެވި ހިސާބުން އޮންނާނީ ފިޔަވަޅުއްތައް އަޅުއްވާފައިކަމަށާއި، މިހާރު މި ހިނގައިގެން އުޅޭ ކަންތަކުގައިވެސް އޮންނާނީ ފުލުހުންނަށް ދަންނަވާފައިކަމަށްވެސް ރައީސް ފާހަގަކުރެއްވިއެވެ.
އެޗްޑީސީގެ ކުރީގެ ޗެއާމަން ޒުހޫރު، ރައީސުލްޖުމްހޫރިއްޔާއަށް ފޮނުއްވިކަމަށް ސޯޝަލް މީޑިއާގައި ދައުރުވަމުންދިޔަ އެ ސިޓީގައި ޒުހޫރު ވިދާޅުވިކަމަށް އޭގައި ލިޔެފައިވަނީ، އެޗްޑީސީގެ ތެރެއިން ކަންކަން ވަނީ ފައިސާދޭ މީހުންނަށް އެކަނި ކަމަށެވެ. ޖުލައިމަހުގެ އެއްވަނަ ދުވަހު ފޮނުވިކަމަށް ބުނާ އެ ސިޓީގައި ބުނެފައިވަނީ، ވަކި އަދަދުތަކުން ފައިސާ ދޭ މީހުންނަށް ފްލެޓާއި ގޯތި ލިބޭ ކަމުގެ އަޑުތައް އިވިފައިވާކަމަށެވެ. އަދި ބޯޑުގެ ކަންކަންވެސް މެނޭޖިންގ ޑިރެކްޓަރު ފަޒުލް ރަޝީދު ކުރައްވަނީ އުސޫލުން ބޭރުން އެމަނިކުފާނަށް ކަންކަން ފަހިވާގޮތަށްކަމަށްވެސް އެ ސިޓީގައި ބުނެފައި ވެއެވެ. މީގެ އިތުރުން އަމިއްލަ މަސްލަހަތު ހިމެނޭ ކަންކަމުގައި ފަޒުލް މަޤާމުގެ ނުފޫޒު ބޭނުންކުރާކަމަށްވެސް އެސިޓީގައި ފާހަގަކޮށްފައި ވެއެވެ.
Advertisement
This content is created and paid for by advertisers and does not involve Voice Journalists
