އިންޑިއާ ލަންކާއާ ދެމެދު ހަދާފައިވާ މިނިވަން ވިޔަފާރީގެ އެއްބަސްވުން އަލުން މުރާޖައާކޮށް، މިޒަމާނަށް ފައްތަން ޖެހޭކަމަށާއި، އެކަން ކުރުމަށް އިންޑިއާއާއެކު މަޝްވަރާކުރައްވާނެކަމަށް ލަންކާގެ ޚާރިޖީ ވަޒީރު ވިޖިތަ ހެރަތު ވިދާޅުވެއްޖެއެވެ.

ނޫސްވެރިންނާ ބައްދަލުކުރައްވައި ކޮޅުނބުގައި ވާހަކަ ދައްކަވަމުން ހެރަތު ވިދާޅުވީ ޒަމާންތަކެއް ވެފައިވާ މި އެއްބަސްވުން މިޒަމާނަށް ފައްތަން ޖެހޭކަމަށް ލަންކާގެ ރައީސް އަނޫރާ ކުމާރަ ޑިސަނަޔަކަ މިދިޔަ ހަފްތާގައި އިންޑިއާއަށް ކުރެއްވި ދަތުރުފުޅުގައި އިންޑިއާގެ އޮފިޝަލުންނަށް ދަންނަވާފައިވާނެކަމަށެވެ.

މީގެ އިތުރުން، އިގްތިސާދާއި ބެހޭ އެހެން ކަންކަމުގައިވެސް އިންޑިއާއާއެކު މަޝްވަރާކުރެއްވި ކަމަށާއި، އެހެންނަމަވެސް ބައެއް މީޑިއާތަކުގައި ރިޕޯޓްކޮށްފައިވާހާ ގިނަ ކަންކަމާ މެދު އަދި އެއްބަސްވުމަކަށް އައިސްފައި ނުވާކަމަށްވެސް އޭނާ ވިދާޅުވިއެވެ. ހެރަތު ވިދާޅުވީ ލަންކާއިން އިންޑިއާއާއެކު އެއްބަސްވާނީ ލަންކާގެ އިގްތިސާދަށް އެއިން ފައިދާކުރާނެ ކަންކަމުގައެވެ.

Advertisement