އެފްއޭއެމް ހިޔާނާތުގެ މައްސަލާގައި އެ އެސޯސިއޭޝަނުގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް އިތުރު ދައުވާތަކެއް އުފުލައިފިއެވެ.
ބައްސާމުގެ މައްޗަށް މިފަހަރު އުފުލި ދައުވާއަކީވެސް އެފްއޭއެމަށް ފީފާއިން ފޮނުވި ފައިސާ މާރުކޮށް އެ ފައިސާއަށް ހިޔާނާތްތެރިވެފައިވާތީވެ އުފުލި ދައުވާތަކެކެވެ. މީގެ ތެރެއިން އެއް ދައުވާއަކީ އަމީން އެޕާޓްމަންޓެއް ގަތުމަށްޓަކައި ފީފާއިން އެފްއޭއެމަށްދިން ފައިސާގެ ތެރެއިން 1.2 މިލިއަން ޑޮލަރަށް ހިޔާނާތްތެރި ވެފައިވާތީވެ ކުރި ދައުވާއެކެވެ.
އަނެއް ދައުވާގައިވެސް ހިމެނެނީ އަމީން އެވެނިއު އެޕާޓްމަންޓްތަކެއް ގަތުމަށް ހިންގި މުއާމަލާތަކާ ގުޅިގެން ކުރި ދައުވާއެކެވެ. އެ އެޕާޓްމަންޓްތަކަށް ދައްކަންޖެހޭ 25 މިލިއަން ރުފިޔާގެ ތެރެއިން، ބުކިން ފީ އާއި ކޮމިޓްމަންޓް ފީއަށްވާ ފައިސާ އަމީން ކޮންސްޓްރަކްޝަނަށް ދައްކާފައިވަނީ ފީފާއިން އެފްއޭއެމަށް ދީފައިހުރި ފައިސާ އެކި އެކައުންޓުތަކަށް ޖަމާކުރުމަށްފަހު އެވެ.
މި މައްސަލާގައި ބައްސާމުގެ މައްޗަށްކުރަނީ މަނީ ލޯންޑަރކުރުމުގެ ކުށުގެ ދައުވާއެވެ. މި ދައުވާ ބައްސާމުގެ މައްޗަށް ސާބިތުވެއްޖެނަމަ އެއްލައްކަ ރުފިޔާ އާއި އެއް މިލިއަން ރުފިޔާ އާ ދެމެދުގެ އަދަދަކުން ޖޫރިމަނާކޮށް، ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލު ހުކުމެއް އިއްވާނެއެވެ.
އެފްއޭއެމްގެ ފައިސާތަކަށް ހިޔާނާތްތެރިވި ކަމަށް ތުހުމަތުކޮށް ބައްސާމްގެ މައްޗަށް ދައުވާކުރާ އިތުރު މައްސަލަތަކެއް ކްރިމިނަލް ކޯޓުގައި ކުރިއަށްދާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
