ނިމިދިޔަ ރައީސް އިބްރާހިމް މުޙައްމަދު ޞާލިހުގެ ސަރުކާރުންވެސް ގެދޮރުވެރިޔާ ސްކީމްގެ ދަށުން ގޯތި ލިބޭ މީހުންގެ ލިސްޓް ހަދާފައިވަނީ ބޭއިންސާފުން އެތައް ބަޔަކަށް ގޯތި ލިބޭގޮތަށްކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް މުޙައްމަދު ނަޝީދު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
މރައީސް ނަޝީދު ވިދާޅުވީ، ނުހައްގުން ގޯތި ބަހާފައިވާ މައްސަލައާއި ގުޅޭ ގޮތުން އަނެއްކާވެސް ދަންނަވަން އޮތީ މީގެ ކުރިންވެސް ދެންނެވި ވާހަކަ ކަމަށާއި، ކުރީގައިވެސް ލިސްޓް ހަދާފައިވަނީ ބޭއިންސާފުން އެތައް ބަޔަކަށް ގޯތި ލިބޭގޮތަށް ކަމަށްވާއިރު، މިފަހަރު އަނެއްކާވެސް އެ ބޭއިންސާފަށް އިތުރު ބޮޅެއް އެކުލަވާލެވިފައިވާކަމަށެވެ.
އެހެންނަމަވެސް މިފަހަރު މި މައްސަލަ މި މައްސަލަ ތަހުގީގުކުރަން ފަށައި، އެޗްޑީސީގެ ވެރިން ބަދަލުކޮށްފައިވާކަން ފާހަގަކުރައްވަމުން ރައީސް ނަޝީދު ވަނީ މިކަމާއި ގުޅޭ ރަނގަޅު ތަހުގީގެއް ފުލުހުން ހިންގަވާނެކަމަށާއި، އެޗްޑީސީގެ އައު މެނޭޖިން ޑިރެކްޓަރ، މައުރޫފް ޖަމީލް ކަންކަން ރަނގަޅު ކުރައްވާނެކަމަށް އުންމީދުކުރައްވާކަމަށް ވިދާޅުވެފައެވެ.
ބިންވެރިޔާ ސްކީމުގެ އުސޫލާ ހިލާފަށް އެޗްޑީސީގެ ކުރީގެ މެނޭޖިންގ ޑިރެކްޓަރު ފަޒުލް ރަޝީދުގެ ބޭބެއަށް ގެވަޅު ދިން މައްސަލައިގެ ޖިނާއީ ތަހުގީގެއް ފުލުހުން ފަށާފައިވާއިރު، މި މައްސަލަ އާއި ގުޅިގެން ފަޒުލް ރަޝީދު އިސްތިއުފާދެއްވާފައިވާއިރު، 20 މީހެއްގެ ޕާސްޕޯޓްވެސް ވަނީ ހިފަހައްޓާފައެވެ.
ފަޒުލް މި މަގާމުން އިސްތިއުފާދެއްވިއިރު، ގެދޮރުވެރިޔާ ސްކީމާއި ގުޅޭ މައްސަލައާއިގުޅިގެން އެ ކޯޕަރޭޝަންގެ ޗެއާމަން އަހްމަދު ނާސިފް ފިޔަވައި ޑިރެކްޓަރުންގެ ބޯޑު މެންބަރުން ސަސްޕެންޑްކޮށްފައިވާއިރު، އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރ މުޙައްމަދު ފަޒީލް ރަޝީދުވެސް ވަނީ ސަސްޕެންޑްކޮށްފައެވެ.
މިއާއިއެކު، އެޗްޑީސީގެ އައު މެނޭޖިން ޑިރެކްޓަރަކަށް މުހައްމަދު މައުރޫފް ޖަމީލް އައްޔަނުކޮށްފައިވަނީ އިއްޔެއެވެ.
Advertisement
This content is created and paid for by advertisers and does not involve Voice Journalists
