ފެނަކަ ކޯޕަރޭޝަން ގެ މެނޭޖިން ޑިރެކްޓަރުގެ މަގާމަށް ހ.ޔެލޯރޯޒް 2، މޭޖަރ (ރިޓަޔަރޑް) މުޙައްމަދު ނަޖާޙް މިއަދު އައްޔަނުކޮށްފިއެވެ.

މި މަގާމަށް ނަޖާހް އައްޔަނުކޮށްފައިވާކަން ޕްރައިވެޓައިޒޭޝަން އެންޑް ކޯޕަރައިޒޭޝަނުން ހާމަކޮށްފައިވަނީ ވަނީ އެކްސްގައި ކުރި ޕޯސްޓެއްްގައެވެ.

ނަޖާހު ވަނީ ސިފައިންގޭގައި 21 އަހަރުވަންދެން ހިދުމަތް ކުރައްވާފައެވެ. އޭނާ އެންމެފަހުން މަސައްކަތް ކުރެއްވީ ހެޕީމާކެޓްގައެވެ.

ފެނަކައިގެ އެމްޑީގެ މަގާމް ހުސްވީ އެމަގާމުގައި ކުރިން ހުންނެވި، މުއާޒު މުހައްމަދު ރަޝީދު މިއަދު މަގާމުން އިސްތިއުފާ ދެއްވުމާއި ގުޅިގެންނެވެ.

މުއާޒްގެ އިސްތިއުފާގެ ސިޓީގައި އެބޭފުޅާ ވަނީ މި މަގާމުން އިސްތިއުފާ ދިނުމަށް ނިންމީ، ފެނަކައަށް ލިބޭ އާމްދަނީއަށްވުރެ ޚަރަދު ބޮޑުވުމުން ދެމެހެއްޓެނިވި ގޮތެއްގައި ޚިދުމަތްތައް ފޯރުކޮށްނުދެވޭނެ ހާލަތަކަށް ކުންފުނި ވެއްޓިފައިވާތީ، އެބޭފުޅާ އެ މަގާމުގައި ހުރެގެން އެކަން ރަނގަޅު ކުރެވޭނެ އަލިމަގެއް ފެންނަން ނެތުމުން ކަމަށް ވިދާޅުވެފައެވެ.

ފެނަކައާ މުއާޒު ހަވާލުވެ ވަޑައިގެންނެވިއިރުވެސް އެ ކުންފުންޏަކީ ދައުލަތުގެ ކުންފުނިތަކުގެ ތެރެއިން އެންމެ ދަރަނިބޮޑު، އަދި ހިންގުމުގެ ހާލަތު އެންމެ ދަށް ކުންފުންޏެވެ. ފެނަކައިން ހަމައެކަނި އެސްޓީއޯގެ ތެއޮ ބިލްތަކަށްވެސް ދައްކަންޖެހޭ ފައިސާގެ އަދަދު ބިލިއަނުން ގުނާލެވެއެވެ. ފެނަކައަށް ބަލާއިރު އެކުންފުންޏަކީ ކޮރަޕްޝަނުގެ ކަންތައްތައްވެސް އެންމެބޮޑު އެއް ކުންފުންޏެވެ. މިގޮތުން ފެނަކައާ ގުޅޭ ގިނަ މައްސަލަތައް އޭސީސީއަށް ހުށަހަޅާފައިވާކަން ފާހަގަކޮށްލެވެއެވެ.

ސަރުކާރުން މީގެކުރިން ވަނީ އެސްޓީއޯ ދަށަށް ފެނަކަ ބަދަލުކޮށްގެންވެސް ހިންގަން އުޅެފައެވެ. ނަމަވެސް ފަހުން އެ މަސައްކަތް ވަނީ ހުއްޓާލާފައެވެ.