ފެނަކައިން އިސްތިއުފާދިނީ ސަރުކާރުން އެއްވެސް ތުހުމަތެއް ކޮށްގެން ނޫންކަމަށް މިއަދު އެކުންފުނީގެ މެނޭޖިންގ ޑިރެކްޓަރުކަމުގެ މަގާމުން އިސްތިއުފާދެއްވި މުއާޒު މުހައްމަދު ވިދާޅުވެއްޖެއެވެ.

ފެނަކައިން މުއާޒު އިސްތިއުފާދެއްވީ އޭނާގެ ކޮރަޕްޝަން ކަންތައްތަކެއް ފެންމަތިވުމުންކަމަށް ބައެއް ފަރާތްތަކުން ގެންދަނީ ސޯޝަލް މީޑިއާގައި ވާހަކަދައްކަމުންނެވެ. އެ ވާހަކަތަކަށް ރައްދު ދެއްވަމުން މުއާޒު އެކްސްގައި ކުރެއްވި ޕޯސްޓެއްގައި ވިދާޅުވީ، އިސްތިއުފާދިނީ ސަރުކާރުން އޭނާގެ މައްޗަށް އެފަދަ އެއްވެސްކަމެއް ތުހުމަތުކޮށްގެން ނޫންކަމަށެވެ. ބައެއް ފަރާތްތަކުން މުއާޒަށް ނިސްބަތްކޮށް ދައްކަމުންދާ ވާހަކަތަކަށް ރައްދުދެއްވަމުން އޭނާ ވިދާޅުވީ، ހަގީގަތް އޮޅުވާލަން މަސައްކަތް ކުރާނެކަމެއް ނެތްކަމަށާއި، ދައްކަން ޖެހިއްޖެއްޔާ ލައްކަ ވާހަކަ އެބަހުރިކަމަށެވެ. ނަމަވެސް އެއިން އެއްވެސް ވާހަކައެއް އޭނާ ހިއްސާކޮށްފައެއް ނުވެއެވެ.

ސޯޝަލް މީޑިއާގައި ސަރުކާރަށް ތާއީދުކުރާ ބައެއް ފަރާތްތަކުން ގެންދަނީ މުއާޒަށް ކޮރަޕްޝަނުގެ ބައެއް ކަހަލަ ކަންކަމުގެ އިނގިލިދިއްކުރަމުންނެވެ. އެގޮތުން ޕްރޮކިއުމަންޓް ކަންކަމަށް ނުފޫޒު ފޯރުވުމާއި މާލީ މުއާމަލާތްތައް އުސޫލުން ބޭރުން ކުރަމުން އަންނަކަން ވަނީ ފާހަގަކޮށްފައެވެ

Advertisement

ފެނަކައިން އިސްތިއުފާ ދެއްވި ސިޓީގައި މުއާޒު ވިދާޅުވެފައިވަނީ، މަގާމުން އިސްތިއުފާ ދޭންޖެހުނީ ކުންފުނީގެ މާލީ ހާލަތު އޮތްގޮތުންނާއި، އަދި ކަންކަން ދާގޮތުން ފެނަކައިުގެ މުސްތަގްބަލު ފަހިވާނޭކަމަށް ނުބެލެވޭތީ ކަމަށެވެ.

މުއާޒު އެގޮތަށް ވިދާޅުވިއިރު، މީގެ އަހަރެއްހާ ދުވަސްކުރިންވެސް ފެނަކައަކީ ސަރުކާރުގެ ކުންފުނިތަކުގެ ތެރެއިން މާލީހާލަތު އެންމެ ދަށް ކުންފުންޏެވެ. ފެނަކައިގެ މާލީހިސާބުތަކަށް ބަލާއިރު، މިދިޔަ އަހަރު ނިމުނުއިރު ފެނަކައިގެ ދަރަނި ހުރީ 4 ބިލިއަން ރުފިޔާއަށްވުރެ މަތީގައެވެ.

ފެނަކައިގެ ދަރަނީގެ ތެރެއިން އެންމެބޮޑު އަދަދެއް ދައްކަންޖެހެނީ އެސްޓީއޯ އަށެވެ. ފެނަކައަށް ދޫކޮށްފައިހުރި ތެއޮ ބިލްތަކުން އެކަނިވެސް އެސްޓީއޯއަށް ބިލިއަނަކަށްވުރެ ގިނަ ރުފިޔާ ދޭންޖެހޭކަމަށް އެސްޓީއޯގެ މާލީބަޔާންތަކުން ދައްކައެވެ.

މުއާޒު ފެނަކައާ ހަވާލުވެ ވަޑައިގެންނެވިއިރުވެސް ފެނަކައިގެ ހާލަތު ވަރަށް ރަނގަޅަށް އެނގޭއިރު، ކުންފުންޏާ ހަވާލުވުމަށްފަހު ފުރަތަމަކޮޅު އަތޮޅުތެރެއަށް ކުރެއްވި ޒިޔާރަތްތަކުގައިވެސް ވަނީ ތަނުގެ ހާލަތާ ގުޅޭގޮތުން ވާހަކަދައްކަވާފައެވެ. މިގޮތުން ކުންފުންޏާ ހަވާލުވާން ޖެހުނީވެސް 4.3 ބިލިއަން ރުފިޔާގެ ދަރަންޏަކާއެކުގައި ކަން މުއާޒް ވަނީ މިއަހަރުގެ މާރޗްމަހުގެ ތެރޭގައި ކެންދޫއަށްކުރި ދަތުރުގައި ވަނީ ވިދާޅުވެފައެވެ. ހަމަ އެހެންމެ ކަން އެގޮތަށް އޮތްނަމަވެސް މި ސަރުކާރުން ފެނަކައިގެ ހާލަތު ރަނގަޅުކުރާނޭކަމަށް މުއާޒު ވަނީ އޭރު ވިދާޅުވެފައެވެ.

މުއާޒު މިއަދު ފެނަކައިން އިސްތިއުފާދެއްވާފައިވާއިރު، ސަރުކާރު ހިންގާ ޕާޓީ، ޕީއެންސީން ވަނީ އެޕާޓީގެ ހަރުގެ ޖަލްސާއެއް މިރޭ 9 ޖަހާއިރު ބޭއްވުމަށް ތާވަލްކޮށްފައެވެ. މި ޖަލްސާއިން ސާފުނުވާ ބައެއް ކަންކަން ސާފުވާނޭކަމަށް ސިޔާސީ މަޝްރަހު ދިރާސާކުރާ ފަރާތްތަކުން ލަފާކުރެއެވެ.