ނުގަވައިދުން އުޅޭ ބިދޭސީން ހޯދުމަށް ކުރިއަށްގެންދާ އޮޕަރޭޝަނުގެ ތެރެއިން އިއްޔެ ހިޔާގެ ވިޔަފާރިތަކަށް އަމާޒުކޮށްގެން ހިންގި އޮޕަރޭޝަނުގައި ގަވާއިދާހިލާފަށް އުޅުނު 4 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން ބުނީ ހިޔާ ޓަވަރުތަކުގައި ވިޔަފާރީގެ ހިދުމަތްތައް ދެމުންގެންދާ 26 ތަނެއް އިއްޔެ ބަލާފާސްކޮށްފައިވާކަމަށެވެ. އެތަންތަން ބަލާފާސްކުރުމުގެ ތެރެއިން ގަވާއިދާހިލާފަށް މަސައްކަތްކުރަމުންދިޔަ ހަތަރު ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށް އެ އިދާރާއިން ބުނެއެވެ.
އިމިގްރޭޝަނުން މިދިޔަ ހޮނިހިރުދުވަހުވެސް ވަނީ ހުޅުމާލޭ ފޭސް 2ގެ ހިޔާ ފުލެޓުތަކުގައި ހިންގަމުންދާ ވިޔަފާރިތަކަށް ހާއްސަކޮށް އިއްޔެ ވަނީ ރެއިޑު އޮޕަރޭޝަނެއް ހިންގާފައެވެ. އެ އޮޕަރޭޝަނުގައި 08 ފިހާރަ، 04 ކެފޭ/ރެސްޓޯރަންޓު/ބޭކަރީ އަދި 01 ސެލޫން ބަލައި ފާސްކޮށް ގަވާއިދާ ހިލާފަށް އުޅެމުންދިޔަ 3 ބިދޭސީއަކު ވަނީ އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.
ބިދޭސީންގެ މަޢުލޫމާތު އެއްކުރުމަށް ކުރިއަށްގެންދާ އޮޕަރޭޝަން ކުރަނގީގައި މިހާތަނަށް 18ހާހަށްވުރެ ގިނަ ބިދޭސީންގެ ބަޔޯމެޓްރިކް ޑޭޓާ ނަގާފައިވާކަަމަށް ސަރުކާރުން ވަނީ ބުނެފައެވެ. އަދި ވޭތުވެދިޔަ އަހަރެއްހާ ދުވަހުގެ ތެރޭގައި ގަވާއިދާހިލާފަށް އުޅެމުންދިޔަ 5،000 ވުރެ ގިނަ ބިދޭސީން ފޮނުވާލާފައިވާކަމަށްވެސް ސަރުކާރުން ބުނެއެވެ.
Advertisement
This content is created and paid for by advertisers and does not involve Voice Journalists
