އޮޅުވެލި ބީޗް އެންޑް ސްޕާ ރިސޯޓު އިތުރަށް ތަރައްގީކުރުމުގެ މަޝްރޫއުގެ މަސައްކަތްތައް ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް  (އީއައިއޭ) ގެ މަރުހަލާ ފުރިހަމަ ކުރުމަކާ ނުލައި ކުރިޔަށް ގެންދިޔުމާ ގުޅިގެން އެންވަރަމެންޓް ޕްރޮޓެކްޝަން އެޖެންސީ (އީޕީއޭ) އިން އެ ރިސޯޓު ޖޫރިމަނާކޮށްފިއެވެ.

އީޕީއޭއިން ނެރުނު ނޫސްބަޔާނެއްގައި ބުނީ، ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް ހެދުމާބެހޭ ގަވާއިދުގެ ދަށުން ފުރިހަމަ ކުރަންޖެހޭ މަރުޙަލާތައް ފުރިހަމަ ކުރުމަކާ ނުލައި އެމެރަލްޑް ރިސޯޓްސް ޕްރައިވެޓް ލިމިޓެޑް އިން ކ. އޮޅުވެލި ބީޗް އެންޑް ސްޕާ ރިސޯޓު އިތުރަށް ތަރައްޤީ ކުރުމުގެ މަސައްކަތްތައް ފަށާފައިވާކަން ސަމާލުކަމަށް އައުމާއި ގުޅިގެން އެމައްސަލަ ބަލަން ފަށާފައިވާކަމަށެވެ.

އެގޮތުން އެމެރަލްޑް ރިސޯޓްސް ޕްރައިވެޓް ލިމިޓެޑް އިން ކ. އޮޅުވެލި ބީޗް އެންޑް ސްޕާ ރިސޯޓު އިތުރަށް ތަރައްޤީކުރުމުގެ މަޝްރޫޢުގެ މަސައްކަތްތައް އީޕީއޭ އިން ތަންފީޒުކުރަމުންގެންދާ ޤާނޫނާއި ގަވާއިދާ ޚިލާފަށް ކުރިޔަށް ގެންގޮސްފައިވާކަން ލިޔެކިޔުންތަކުންނާއި ބެލިބެލުންތަކުންވެސް ސާބިތުވާކަމަށް އީޕީއޭއިން ބުނެއެވެ.

Advertisement

އީޕީއޭއިން ބުނީ، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނު ގެ ދަށުން އެކުލަވާލެވިފައިވާ ގަވާއިދު ގެ 20 ވަނަ ދަށުން އެމެރަލްޑް ރިސޯޓްސް ޕްރައިވެޓް ލިމިޓެޑް 20،000 ރުފިޔާއިން ޖޫރިމަނާ ކުރެވިފައިވާކަން 11 ޑިސެމްބަރ 2024 ގައި އެންގުމުން، އެ ކުންފުނިން ޖޫރިމަނާއަށްވާ ފައިސާ 18 ޑިސެމްބަރ 2024 ގައި ދައްކާފައިވާކަމަށެވެ.

މިއާއިއެކު،  އެމެރަލްޑް ރިސޯޓްސް ޕްރައިވެޓް ލިމިޓެޑް ގެ ފަރާތުން ކުރިޔަށް ގެންދާ އެންމެހާ މަޝްރޫޢުތަކުގެ މަސައްކަތްތައް ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް ހެދުމާބެހޭ ގަވާއިދާއި އެއްގޮތްވާ ގޮތުގެ މަތިން، އެ ގަވާއިދުގައި ބަޔާންކޮށްފައިވާ މަރުޙަލާތައް ފުރިހަމަ ކުރުމަށްފަހު ކުރިޔަށް ގެންދިޔުމަށް ނަސޭހަތްތެރިވެފައިވާކަމަށް ވެސް އީޕީއޭއިން މައުލޫމާތުދެއެވެ.