ޓޫރިޒަމް މިނިސްޓްރީގެ ސްޓޭޓް މިނިސްޓަރު ކަމުގެ މަގާމުގައި ހުންނެވި މުހައްމަދު ނިހާދު މަގާމުން ސަސްޕެންޑްކޮށްފިއެވެ.
ނިހާދު މި މަގާމުން ސަސްޕެންޑް ކޮށްފައި މިވަނީ ރޭގައި ޕީއެންސީގެ ޖަލްސާގައި އެމްޑީޕީން ރާއްޖޭގެ ޓޫރިޒަމަށް ގެއްލުންތަކެއް ދިނުމަށް މަސައްކަތްކުރާކަމަށް ވާހަކަތަކެއް ދައްކާފައިވަނިކޮށެވެ.
ރޭގެ ޖަލްސާގައި ވާހަކަފުޅު ދައްކަވަމުން ނިހާދު ވަނީ އަންނަ ބުރާސްފަތި ދުވަހަށް ރާއްޖެއަށް މި އަހަރު ޒިޔާރަތްކުރާ ފަތުރުވެރިންގެ އަދަދު 2 މިލިއަނާ ހަމަކުރަން މަސައްކަތް ކުރަމުންދާ މި ދަނޑިވަޅުގައި ފަތުރުވެރިކަމަށް ހުރަސް އެޅުމަށް އެމްޑީޕީ މަސައްކަތްކުރަމުންދާކަމުގެ ތުހުމަތުކޮށްފައެވެ.
މިގޮތުން ނިހާދު ވަނީ މާލެ ކައިރީގައި އެއް ފަޅުތެރެއެއްގައި އޮތް ތިން ރިސޯޓެއްގައި އެމްޑީޕީން ބައްދަލުވުމެއް ބާއްވަން އެދުމުން މި ދުވަސްކޮޅު ރިސޯޓް ފުލްވެފައިވާތީ ނުބޭއްވޭނެ ކަމަށް އެންގުމުން ހުއްދަ ނުލިބުނަސް އެ ރިސޯޓަށް އެމްޑީޕީން އަރާނެ ކަމުގެ އިންޒާރު އެޕާޓީން ދީފައިވާ ކަމަށް ވިދާޅުވެފައެވެ. އެގޮތުން އަންގާރަ ދުވަހުގެ ހަވީރު ހަަތަރެއް ޖަހާއިރު ރިސޯޓަކަށް އެރުމަށް އެމްޑީޕީން ރާވާފައިވާއިރު، އެ ރިސޯޓަށް އެރުމުގެ ފަހަތުގައި ހުންނެވީ އެމްޑީޕީގެ ޗެއާޕާސަން ފައްޔާޒު އިސްމާއިލް ކަމަށް ރޭގެ ޖަލްސާގައި ނިހާދު ވަނީ ވިދާޅުވެފައެވެ.
މިކަމާ ގުޅިގެން އެމްޑީޕީން މިއަދު ވަނީ ނިހާދުގެ އެ ވާހަކަތައް ކުށްވެރިކޮށް ބަޔާނެއްވެސް ނެރެފައެވެ. މި ބަޔާނުގައި އެމްޑީޕީން ވަނީ ނިހާދުގެ މައްޗަށް ފިޔަވަޅު އެޅުމަށްވެސް ގޮވާލާފައެވެ.
Advertisement
This content is created and paid for by advertisers and does not involve Voice Journalists
