ހައްޖުގެ އަޅުކަން އަދާނުކުރެވި ތިބި މީހުންނަށް އިސްކަންދޭގޮތަށް އަމަލުކުރުމުގެ ވިސްނުން ހުރިކަމަށް އިސްލާމީ ކަންތައްތަކާއި ބެހޭ ވަޒީރު، ޑރ.މުޙައްމަދު ޝަހީމް އަލީ ސައީދު ހާމަކުރައްވައިފިއެވެ.
ވަޒީރު ޝަހީމް މިފަދައިން ހާމަކުރައްވާފައިވަނީ ފޭސްބުކްގައި ކުރެއްވި ޕޯސްޓެއްގައެވެ.
މިގޮތުން ވަޒީރު ޝަހީމް ވިދާޅުވީ، ފަރުޟު ޙައްޖު އަދާކޮށްފައި ތިބޭ ފަރާތްތަކަށް ދެވަނަ ހައްޖެއް ކުރެވޭނީ ހައްޖުކުރާތާ 5 އަހަރު ފަހުންކަމަށް ބައެއް ޤައުމުތަކުގައި އުޞޫލުތައް ހަދާފައިހުންކަމަށެވެ.
މިއީ ފަރުޟު ނުވަތަ ފުރަތަމަ ހައްޖުކުރަން އެދޭ ފަރާތްތަކަށް ފުރުޞަތު ދިނުމުގެ ގޮތުން ކުރާކަމެއްކަން ފާހަގަކުރައްވާ ވަޒީރު ޝަހީމް ވަނީ ރާއްޖޭގައި މިފަދަ އުސޫލެއް ގާއިމްކުރުމާއިމެދު އާއްމުންގެ ހިޔާލަށް ހުޅުވާލައްވާފައެވެ.
ރާއްޖޭގައި މިހާރު އަމަލު ކުރަމުން އަންނަ އުސޫލުގެ ދަށުން ޢުމުރުން ދުވަސްވީ މީހުންނާއި ބަލި މީހުންނަށް ފުރުޞަތު ދިނުމުގައި އިސްކަންދިންނަމަވެސް، ޙައްޖަށް ދިއުމަށް ބޭނުންވާ ޢަދަދަށް ފައިސާ ދައްކައިފިނަމަ ކޮންމެ މީހަކަށްވެސް ފުރުޞަތުދޭއިރު، އަލަށް ޙައްޖުގެ އަޅުކަން އަދާކުރަން ބޭނުންވާ މީހުންނަށް އިސްކަންދޭނެ ތަރުތީބެއް ނެތެވެ.
ރަސްމީ ކޯޓާގެ ގޮތުގައި ރާއްޖެއަށް ކޮންމެ އަހަރަކުވެސް ލިބެނީ 1000 ޙައްޖު ކޯޓާކަމަށްވާއިރު، ލިބޭ މަދު ކޯޓާއިން ޙައްޖުވާން ބޭނުންވާ މީހުންނަށް ފުރުޞަތު ނުލިބޭކަމުގެ ކަންބޮޑުވުން އަބަދުވެސް އޮވެއެވެ.
Advertisement
This content is created and paid for by advertisers and does not involve Voice Journalists
