ޤައުމީ ފެންކުންފުނީގެ ސަބްސިޑަރީ ކުންފުނި، އައިލެންޑް ބެވަރެޖް މޯލްޑިވްސް (އައިބީއެމް)ގެ މަސައްކަތްތެރިން ތިބުމަށް ހޯދި ތަނުގެ އެއްބަސްވުން އައިބީއެމުން ބާތިލްކޮށްފިއެވެ.

އައިބީއެމުން ކުއްޔަށް ތަނުގެ އެއްބަސްވުން ބާތިލްކޮށްފައިވަނީ، ބިޑްކުރުމެއްނެތި ބޮޑު އަގުގައި ކުއްޔަށްނެގި މައްސަލައެއް ފެންމަތިވުމާ ގުޅިގެންނެވެ. އެ އެއްބަސްވުން ސޯޝަލް މީޑިއާގައި ދައުރުވަމުންދާއިރު، މީގެކުރިން މަހަކު 60،000 ހާސްރުފިޔާގެ އަގަކަށް ކުއްޔަށް ހިފިތަން، އެންމެފަހުން ކުއްޔަށް ހިފާފައިވަނީ މަހަކު 200،000 ރުފިޔާ ދައްކާގޮތަށްކަމަށް ލީކުވި ލިޔުންތަކުން އެނގެއެވެ.

މިކަމާ ގުޅިގެން ސޯޝަލް މީޑިއާގައި ގިނަބަޔަކު އެވާހަކަދައްކައި ކަންބޮޑުވުން ފާޅުކުރަމުން ދަނިކޮށް، އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އައިބީއެމަށް ލޭބަރ އެކަމޮޑޭޝަން ހޯދުމުގެ އަގުތަކާއި ގުޅޭ ޝަކުވާއެއް މީގެ ދުވަސްކޮޅެއް ކުރިން ލިބިފައިވާކަމަށެވެ. އެގޮތުން އެކަން ކުރިޔަށް ގޮސްފައިވާގޮތާ އަގުތައް އިންޓަރނަލް އޮޑިޓް ޓީމުން ބެލުމަށްފަހު ބޯޑުގައި މަޝްވަރާކުރެވި އެކަމާގުޅިގެން އަޅަންޖެހޭ ފިޔަވަޅުތައް އެޅުމަށް އަންގައި، މިހާރުގެ އެއްބަސްވުން ބާޠިލުކޮށް ލޭބަރ އެކޮމޮޑޭޝަންެ ހޯދުމުގެ މަސައްކަތް އަލުން ކުރިއަށް ގެންދިޔުމަށް އައިބީއެމްއަށް އަންގާފައިވާކަމަށެވެ.

ސޯޝަލް މީޑިއާގައި ދައުރުވަމުންދާ ލިޔެކިޔުންތަކަށް ބަާއިރު، ޓެލެ މޯލްޑިވްސް ކިޔާ ކުންފުންޏަކުން ނެގި އެތަން ކުއްޔަށް ނަގާފައިވަނީ 5 އަހަރުދުވަހުގެ މުއްދަތަކަށެވެ. އެއީ 12 މިލިއަން ރުފިޔާއަށެވެ.