ބިންވެރިޔާ ސްކީމުން އުސޫލްތަކާ ހިލާފަށް ގެވަޅުދިން މައްސަލާގައި ޝާމިލްވާ މީހުންގެ މުއާސަލާތީ އާލާތްތައް ފުލުހުން ހިފަހައްޓައިފިއެވެ.
މިކަމާ ގުޅޭގޮތުން މީޑިއާތަކަށް ހިއްސާކުރަމުން ފުލުހުން ބުނީ، އެމީހުންގެ މުއާސަލާތީ ވަސީލަތްތައް ހިފެހެއްޓީ ކޯޓު އަމުރެއްގެ ދަށުންކަމަށެވެ. އެތަކެތި ހިފަހައްޓާފައިވަނީ މިރޭގެ ވަގުތެއްގައެވެ. ބިންވެރިޔާ ސްކީމްގެ އުސޫލުން ބޭރުން އެޗްޑީސީގެ ކުރީގެ މެނޭޖިންގ ޑިރެކްޓަރު ފަޒުލް ރަޝީދުގެ ބޭބެ، ފަޒީލް ރަޝީދަށް ގެވަޅެއް ދޫކުރި މައްސަލަ ބޮޑުވެފައިވާއިރު، ފުލުހުން ދަނީ މި މައްސަލަ ތަހުގީގުކުރަމުންނެވެ. ފުލުހުން އެ މައްސަލަ ބަލަނީ ޖިނާއީ މައްސަލައެއްގެ ގޮތުގައެވެ.
ގެވަޅުދޫކުރި މި މައްސަލާގައި އެޗްޑީސީއަށް ނިސްބަތްވާ 15 މުއައްޒަފަކު ހިމެނޭއިރު، ހައުސިން މިނިސްޓްރީގެ 10 މުއައްޒަފަކުވެސް ހިމެނޭކަމަށް މައުލޫމާތު ލިބެއެވެ. ވޮއިސްއަށް މައުލޫމާތު ލިބިފައިވާގޮތުގައި މީގެ ތެރެއިން ގިނަ މުއައްޒަފުންތަކެއް އަދިވެސް ތިބީ ވަޒީފާގެ ޒިއްމާތަކުން އެއްފަރާތްކޮށްފައެވެ.
އުސޫލާ ހިލާފަށް ގެވަޅުދިން މައްސަލާގައި އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދު މަގާމުން އަމިއްލައަށް އިސްތިއުފާދެއްވާފައިވާއިރު، ސަރުކާރުން ވަނީ އެމަގާމަށް މުހައްމަދު މައުރޫފް ޖަމީލް އައްޔަނުކުރައްވާފައެވެ. އޭގެ ކުރިން މި މައްސަލާގައި ސަރުކާރުން ވަނީ ޗެއާމަން ފިޔަވައި އެޗްޑީސީގެ މުޅި ބޯޑުވެސް ސަސްޕެންޑްކޮށްފައެވެ. ނަމަވެސް މިހާރު ވަނީ ސަސްޕެންޝަން އުވާލާފައެވެ.
Advertisement
This content is created and paid for by advertisers and does not involve Voice Journalists
