ގެދޮރުވެރިޔާ ސްކީމުގެ މައްސަލާގައި ކޮރަޕްޝަނަށް ފަހިވާގޮތަށް ފްލެޓް ދިނުމުގެ ކަންކަން ކުރިއަށްގެންދިޔަ މީހުންގެ މައްޗަށް ދައުވާކުރުމާމެދު މަޝްވަރާތައް ފަށާފައިވާކަމަށް އެންޓި ކޮރަޕްޝަން ކޮމިޝަން (އޭސީސީން) ބުނެފިއެވެ.

އޭސީސީން ބުނީ ގެދޮރުވެރިޔާ ސްކީމުގެ ދަށުން ދޫކުރުމަށް ނިންމާފައިވާ 4،000 ފެލްޓް މައްސަލާގައި ދައުވާކުރަންޖެހޭ މީހުންގެ މައްޗަށް ދައުވާ ކުރުމާމެދު ޕީޖީ އޮފީހާއެކު މަޝްވަރާތައް ފަށާފައިވާކަމަށެވެ. އެގޮތުން މި މައްސަލާގައި ރަސްމީކޮށް ޑިއުޓީ ޕްރޮސިކިއުޝަން މަރުހަލާ ކުރިއަށްދާކަމަށް އޭސީސީން ވަނީ ބުނެފައެވެ.

އޭސީސީން ބުނީ އާއްމު މަސްލަހަތު ބޮޑުވެގެންވާ މި މައްސަލައިގެ އުޓީ ޕްރޮސިކިއުޝަން މަރުހަލާ ނިންމައި ދައުވާކުރެވޭނެ ފަރާތްތަކުގެ މައްޗަށް ދައުވާކޮށްދިނުމަށް އެދެން، ކުރަންޖެހޭ މަސައްކަތްތައް އެ ކޮމިޝަނުން ވީއެންމެ އަވަހަކަށް ކުރަމުންގެންދާނެ ކަމަށެވެ. ނިމިދިޔަ ރައީސް އިބްރާހިމް މުޙައްމަދު ޞާލިހުގެ ވެރިކަމުގައި ކުރިއަށް ގެންދިޔަ "ގެދޮރުވެރިޔާ" ސްކީމްގެ ދަށުން ފްލެޓްތައް ދޫކުރި މައްސަލާގައި އޭސީސީން ވަނީ އެ މައްސަލަ ތަހުގީގުގައި ފްލެޓްތައް ދޫކުރުމުގައި އިސްކޮށް މަސައްކަތްކުރި ކޮމިޓީގައި ހިމެނޭ ބޭފުޅުންގެ ގޭގެއަށް ވަދެ ފާސްކޮށްފައެވެ. 

Advertisement

މިދިޔަ ސަރުކާރު ނިމެނިކޮށް ދޮރުވެރިޔާ ފްލެޓްތައް ލިބޭ މީހުންގެ ދާއިމީ ލިސްޓެއް އާއްމުކުރިއިރު، އޭސީސީން ވަނީ އެ ލިސްޓަށް ފްލެޓް ދޫކުރުން ހުއްޓުވާފައެވެ. އެއަށްފަހު ބައެއް ކަންތަކަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ. އެހެންނަމަވެސް އޭގެ ތެރެއިން 59.6 އިންސައްތަ މީހުން ޝަރުތު ހަމަނުވާ ކަމަށް އޭރު އޭސީސީން ވަނީ ހާމަކޮށްފައެވެ.