ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓަރު، އަހުމަދު ސައީދުގެ މައްޗަށް ދައުވާކުރަން ކްރިމިނަލް ކޯޓަށް ފޮނުވައިފިއެވެ.

ނިމިގެންދިޔަ ވެރިކަމުގައި ފެނަކައިގެ ތެރެއިން ކޮރަޕްޝަން ހިމެނޭ ކަންކަން ހިންގާފައިވާކަމަށް ބުނެ ފެނަކައިގެ މިހާރުގެ މެނޭޖްމަންޓުން ވަނީ، އެ މައްސަލަތައް ޝަރީއަތަށް ހުށަހަޅާފައެވެ.

ޕްރޮސެކިއުޓަރ ޖެނެރަލް ޕީޖީ އޮފީހުން ބުނީ، ސައީދުގެ އިތުރުން، ފެނަކަ ކުންފުނީގެ ކުރީގެ ޕްރޮކިއުމަންޓް ހެޑް، މަރިޔަމް ދީނާގެ މައްޗައްވެސް ދައުވާކުރަން ކޯޓަށް ފޮނުވާފައިވާކަމަށެވެ. އެއީ ފެނަކަ ކޯޕަރޭޝަނާއި ބްލޭޒަން އިންކް ކުންފުންޏާ ދެމެދު ވެވުނު އެއްބަސްވުމުގައި މަސައްކަތް ފުރިހަމަ ނުކުރަނީސް މަސައްކަތުގެ އަގު ދީ ނިންމުމުންނެވެ. މި މައްސަލާގައި އެ ދެ ފަރާތަށް ދައުވާކުރަނީ ބްލޭޒަން ކުންފުންނަށް ނަހަމަގޮތެއްގައި މާލީމަންފާއެއް ހޯދައިދިނުމަށް، ރަސްމީ ހައިސިއްޔަތު ނަހަމަގޮތުގައި ބޭނުންކޮށްފައިވާތީއެވެ. ދައުވާގައި ބަޔާންކޮށްފައިވާގޮތުން އެ މުއާމަލާތާ ގުޅިގެން ފެނަކައަށް 848،000 ރުފިޔާގެ ގެއްލުމެއް ވަނީ ލިބިފައެވެ.

Advertisement

މި މައްސާލަ ސާބިތުވެއްޖެނަމަ، އެއް އަހަރާ ހަތްމަހާއި ހަ ދުވަހުގެ ޖަލުހުކުމެއް އަންނާނެއެވެ. އޭސީސީން ބަލަމުންދިޔަ މައްސަލައަކާ ގުޅިގެން ސައީދުގެ ޕާސްޕޯޓްވެސް ވަނީ މިދިޔަ އޮކްޓޯބަރުމަހު ހިފަހައްޓާފައެވެ.

ފެނަކައިގެ ކުރީގެ މެނޭޖްމަންޓާ ގުޅޭ 25 މައްސަލަ ހިމެނޭކަމަށް މިފަހުން އިސްތިއުފާދެއްވި ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވަނީ މީޑިއާގައި ވިދާޅުވެފައެވެ.

ސަރުކާރުގެ ކުންފުނިތަކުގެ ތެރެއިން ފެނަކައަކީ މާލީހާލަތު އެންމެ ދަށް ކުންފުންޏެވެ. ފެނަކައިގެ މާލީހިސާބުތަކަށް ބަލާއިރު، މިދިޔަ އަހަރު ނިމުނުއިރު ފެނަކައިގެ ދަރަނި ހުރީ 4 ބިލިއަން ރުފިޔާއަށްވުރެ މަތީގައެވެ.