ޤަވާއިދާ ހިލާފަށް ރާއްޖެ ސަރަހައްދުގައި އުޅުނު މަސްބޯޓެއް، ޑްރޯންގެ އެހީތެރިކަމާއެކު ކޯސްޓްގާޑުގެ ބެލުމުގެ ދަށަށް ގެންގޮސްފިކަމަށް އެމްއެންޑީއެފުން ބުނެފިއެވެ.

މިކަމާ ގުޅޭގޮތުން އެމްއެންޑީއެފުން ބުނީ، ރާއްޖޭގެ ޚާއްޞަ އިޤްތިޞާދީ ސަރަހައްދު ބެލެހެއްޓުމަށް ހިންގި އޮޕަރޭޝަނެއްގައި، ޤާނޫނާ ޚިލާފަށް ޚާއްޞަ އިޤްތިޞާދީ ސަރަހައްދުގައި ހަރަކާތްތެރިވަމުންދިޔަ ބޭރުގެ މަސް ބޯޓެއް، އަތުލައިގަނެފައިވާކަމަށެވެ. މި މަސްބޯޓު އަތުލައިގަނެފައިވަނީ، އެމްއެންޑީއެފް އެއަރ ކޯރ ޑްރޯން ގެ އެހީގައި ލޮކޭޓް ކުރުމަށްފަހުކަމަށް އެމްއެންޑީއެފުން ބުނެއެވެ.

ޑްރޯން ބޭނުންކޮށްގެން މީގެ ކުރިން ވަނީ ރެސްކިއު އޮޕަރޭޝަންތައް ކާމިޔާބުކަމާއެކު ކުރިއަށްގެންގޮސްފައެވެ. 

އެމްއެންޑީއެފް އެއަރ ކޯރގައި ބޭނުންކުރަނީ ތުރުކީވިލާތުގެ ބައިރަކްތާރު ޓީބީ2 މަރުކާގެ ޑްރޯންނެވެ. ބައިރަކްތާރު ޓީބީ2" ޑްރޯނަކީ 18،000 އަދި 25،000 ފޫޓު މަތިން އުދުއްސޭނެ އުޅަނދުތަކެކެވެ. 70 އާއި 120 ކިލޯމީޓަރާ ދެމެދުގެ ބާރުމިނުގައި އުދުހެވޭ މި އުޅަނދުތަކަކީ ނައިޓް ވިޝަން ކޭޕަބިލިޓީ އާއެކު ރޭގަނޑުވެސް ވަގުތުން ފޮޓޯއާއި ވީޑިއޯ ފޮނުވޭނެ އުޅަނދެކެވެ. ހަމައެއާއެކު 300 ކިލޯމީޓަރު ދުރުން މައިމަރުކަޒަށް މައުލޫމާތު ފޯރުކޮށްދިނުމުގެ ގާބިލްކަން ލިބިފައިވާ މި ޑްރޯންތަކަށް ހުއްޓުމެއް ނެތި 27-50 ގަޑިއިރު އުދުހުމުގެ ގާބިލްކަން ވެސް ލިބިފައިވެއެވެ. އަދި ބޭނުންނަމަ ހަތިޔާރު ހަރުކުރެވޭ މި ޑްރޯންގެ ބޮޑުމިނަކީ 21 ފޫޓެވެ.