އިންޑިއާގެ ކުރީގެ ބޮޑުވަޒީރު މަންމޯހަން ސިންހް އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.

މަންމޯހަން ސިންހް އަވަހާރަވެފައިވަނީ ވެރިރަށް ނިއުދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އައިމްސް)ގެ އެމާޖެންސީ ވޯޑުގައި ފަރުވާދެމުންދަނިކޮށެވެ. މަންމޯހަން ސިންހު އަވަހާރަވުމާ ގުޅިގެން، ސޯޝަލް މީޑިއާގައި ރައީސް ޕޯސްޓްކުރެއްވި ތައުޒިޔާގެ މެސެޖުގައި ވިދާޅުވެފައިވަނީ، މި ހިތާމަވެރި ވަގުތުގައި ދިވެހިރާއްޖޭގެ ރައްޔިތުންނާއި އެމަނިކުފާނު ވަނީ އިންޑިއާގެ ރައްޔިތުންނާއެކުގައި ކަމަށެވެ. އަދި މަންމޯހަން ސިންހްގެ އާއިލާ އަށާއި އިންޑިއާގެ ރައްޔިތުންނަށް ރައީސް ޑރ.މުއިއްޒު ވަނީ ތައުޒިޔާ ވިދާޅުވެފައެވެ.

ރައީސް ޑރ.މުއިއްޒުގެ ޕޯސްޓްގައި ވިދާޅުވެފައިވަނީ 2011 ވަނަ އަހަރު މަންމޯހަން ސިންހް ރާއްޖެއަށް ކުރެއްވި ތާރީހީ ދަތުރުފުޅަކީ ރާއްޖޭގެ އިގްތިސާދަށާއި އިޖުތިމާއީ ތަރައްޤީއަށް މުހިއްމުވެގެންދިޔަ ދަތުރުފުޅެއް ކަމަށެވެ. މީގެ އިތުރުން މަންމޯހަން ސިންހްގެ "ލުކް އީސްޓް ޕޮލިސީ" އަކީ ދެކުނު އޭޝިއާގެ ތަރައްޤީއަށް މުހިއްމު ސިޔާސަތެއްކަން ރައީސް ޑރ.މުއިއްޒު ވަނީ ފާހަގަކުރައްވާފައެވެ.

Advertisement

މަންމޯހަން ސިންހް އަވަހާރަވީއިރު އުމުރުފުޅަކީ 92 އަހަރެވެ. އެމަނިކުފާނުގެ ސިޔާސީ ހަޔާތްޕުޅުގައި ވަނީ އިންޑިއާއަށް ގިނަ ހިދުމަތްތަކެއް ކުރައްވާފައެވެ. އޭގެ ތެރެއިން މަންމޯހަން ސިންހް އިންޑިއާގެ ބޮޑުވަޒީރުކަން ކުރެއްވީ 2004 ވަނަ އަހަރުން ފެށިގެން 2014 ވަނަ އަހަރުގެ ނިޔަލަށެވެ. ގިނަ ބަޔަކު ފާހަގަކުރާގޮތުގައި އެމަނިކުފާނަކީ އިންޑިއާ އިންޑިއާ މިއަދު މިދެކޭ އިގްތިސާދީ ބަދަލު ގެނައުމުގައި ފާހަގަކޮށްލެވޭފަދަ ސިޔާސަތުތަކެއް ތައާރަފްކޮށްދެއްވި ބޭފުޅެކެވެ.