މާލޭ އާޓިފިޝަލް ބީޗްގައި މިރޭ ހަވާއެރުވުމަށް ނިންމާފައިވާކަމަށް އެމްއެންޑިއެފުން ބުނެފިއެވެ.

މިކަމާ ގުޅޭގޮތުން އެމްއެންޑީއެފުން ބުނީ، އާޓިފިޝަލް ބީޗް މޫދުގައި މިރޭ 21:00 ގައި ހަވާ އެރުވުމަށް ހަމަޖެހިފައިވާކަމަށެވެ. މިއީ ވިޔަފާރި އުސޫލުން ޕްރައިވެޓް އިވެންޓަކަށް ސިފައިންގެ ކޯޕަރޭޓިވް (ސިފްކޯ) އިން ކުރިއަށްގެންދާ ހަރަކާތެއް ކަމަށްވެސް އެމްއެންޑީއެފުން ބުންޏެވެ. މިރޭ ކުރިއަށްގެންދިއުމަށް ނިންމާފައިވާ ހަވާއެރުވުމުގެ ހަރަކާތް ކުރިއަށް ދާނީ 5 މިނެޓެއް ހާއިރަށްކަމަށްވެސް އެމްއެންޑީއެފުން ބުންޏެވެ.

އެމްއެންޑިއެފުން ވަނީ ރޭ ހުޅުމާލެ ފޭސް 3 ސަރަހައްދުގައިވެސް ހަވާއަރުވާފައެވެ. ހަވާއެރުވުމުގެ އެ ހަރަކާތަކީ އައު އަހަރަށް ތައްޔާރުވުމުގެ ގޮތުން ކުރިއަށްގެންދިޔަ ކަމެއްކަމަށް އެމްއެންޑީއެފުން ވަނީ ބުނެފައެވެ.