ކިތަންމެ އަގީދާ ވަރުގަދަ މީހަކުވެސް މާޔޫސްވުމުގެ ތެރެއަށް ވެއްޓިދާނޭކަމަށް މިއަދުގެ ހުކުރު ހުތުބާގައި ބުނެފިއެވެ.

މިއަދުގެ ހުކުރު ހުތުބާ ހާއްސަކޮށްފައިވަނީ "ދިރިއުޅޫމުގައި ދިމާވާ ދަތިތަކާމެދު މާޔޫސް ނުވުން" މި މައުލޫއަށެވެ. ހުތުބާގައި ބުނީ، ހިތްދަތިކަމުން އަރައިގަތުމަށް މަސައްކަތްކުރަންވާނީ އަޒުމާ ހިތްވަރާއެކު ކަމަށާއި ކިތަންމެ އަގީދާ ވަރުގަދަ މީހަކުވެސް މޫޔޫސްކަމުގެ ތެރެއަށް ވެއްޓިދާނޭ ހާލަތެއް އަތުވެދާނޭކަމަށެވެ. އަދި އެއީ މީހާގެ އަގީދާގެ ބަލިކަށިކަމުން ވާ ކަމެއްނޫންކަމަށެވެ. އެއީ އިންސާނާގެ ނަފްސުގެ ބަލިކަށި ކަމެވެ. އިންސާނާގެ ނަފްސު މާޔޫސްކަމުން ސަލާމަތްވުމަށްޓަކައި އަގީދާގައި ސާބިތުވެ ހުރުމަކީ މުހިއްމު ކަމެކެވެ. އެގޮތުން މަސްވާސްތަކުގެ ޝިކާރައަކަށް ނުވެ، ވަރުގަދަ އަޒުމާއެކުސަލާމަތުގެ އައްސޭރިއަށް ވާސިލްވެވިދާނޭކަމަށް ހުތުބާގައި ބުންޏެވެ.

ހުތުބާގައި ބުނީ ދިރިއުޅުމުގައި ދިމާވާ ދަތިކަމަކަށްފަހު ލުޔެއް ލިބޭނޭކަމުގެ އުއްމީދުޔ ބައެއް މީހުން ކަނދާލާ ކަމަށާއި، ނަމަވެސް އިންސާނާއާ އެކި ގޮތްގޮތުން ދިމާވާ މުސީބާތްތަކާއި ދަތިކަން ފިލައިދިއުން ﷲގެ އިރާދަފުޅުގައި ކަނޑައަޅުއްވާފައިވާކަމަށެވެ. އެހެންނަމަވެސް ބައެއްމީހުންގެ މަސައްކަތްތަކަށް ވެފައި އޮންނަނީ، އެފަދަ ކަންކަމުން ސަލާމަތްވުމަށް މަސައްކަތްކުރުމުގެ ބަދަލުގައި ނާއުއްމީދުގެ ބަސްތައް ތަކުރާރުކުރުމެވެ. މިފަދަ ޝުއޫރުތަކާ ވާހަކަތައް ދެކެވެނީ އުއްމީދު ކެނޑި ދުނިޔަވީ ހަޔާތުން މާޔޫސްވެފައިވާތީކަން ފާހަގަކުރަމުން ހުތުބާގައި ބުނީ، ސަބަބުތަކުގައި ހިފައި ހާލަތު ބަދަލުކުރުމަށް މަސައްކަތްކުރުމަށް އިންސާނާ ފަހަތަށް ޖެހޭކަމަށެވެ. 

ﷲ ވަހީކުރެއްވި އާޔަތެއްގެ މާނާގައި ވެއެވެ. "އަދި ތިމަން ރަސްކަލާނގެ އިންސާނާއަށް ރަހުމަތް ލައްވައި، ދެން އޭނާގެ ކިބައިން ތިމަސް ރަސްކަލާނގެ ރަހުމަތް ނިގުޅައިގެންފިނަމަ، ހަމަކަށަވަރުން އޭނާ ވާނީ ތިމަން ރަސްކަލާނގެ ރަހުމަތުން އުއްމީދު ކަނދާލައި ރަހުމަތާ ދެކޮޅުހަދާ ކާފަރަކަށެވެ"

ހުތުބާގައި ބުނީ ކީރިތި ގުރުއާނުގައި މާޔޫސްވުމާއި އުއްމީދުކެނޑުމާ މެދު އެތައް ބަސްފުޅުތަކެއް އައިސްފައިވާކަމަށެވެ. އެއީ އަޅާ އޭނާގެ ވެރިރަސްކަލާނގެ ހަސްރަތަށް ރުޖޫއަވެ، ތައުބާވުންކަމުގައި ވިޔަސް، ނުވަތަ ޤަޟާގަދަރާ ގުޅުންހުރި ކަމެއް ކަމުގައި ވިޔަސްމެއެވެ. ހެޔޮމިންވަރާއި ނުބައި މިންވަރަށް އީމާންވުން އީމާންކަމުގެ ރުކުނެއްގެ ގޮތުގައި ކަނޑައަޅުއްވާފައިވަނީ މާޔޫސްކަމާއި އެތައް ނުރައްކަލަކުން އިންސާނާ ސަލާމަތުގެ އައްސޭރިއަސް ގެންގޮސްދިނުމުގެ ބާރެއްގެ ގޮތުންނެވެ.

ކަންކަމުގައި ﷲ އާ ވަކީލްކުރުމަކީ އީމާންކަމުގެ ތެރެއިންވާ ކަމެކެވެ. އަދި ﷲ ގެ ރަހުމަތާމެދު މާޔޫސްވުމަކީ މަގުފުރެދުމުގެ ސަބަބުތަކުގެ ތެރެއިން ސަބަބެއްކަމުގައި ސިފަކުރައްކުރައްވައި ﷲ ވަހީކުރެއްވި އާޔަތެއްގެ މާނައިގަ ވެއެވެ. "އަދި ތިޔަބައިމީހުން ނުރުހޭކަމެއް އެއީ ތިޔަބައިމީހުންނަށް ލާބަހުރިކަމަކަށް ވެދާނެތެވެ. އަދި ތިޔަބައިމީހުން ރުހޭކަމެއް  އެއީ ތިޔަބައިމީހުންނަށް ގެއްލުންހުރި ކަމަކަށް ވެދާނެތެވެ. އަދި ﷲ ހުރިހައި ކަމެއްމެ މޮޅަށް ދެނެވޮޑިގެން ވެއެވެ. ތިޔަބައިމީހުންނަކަށް ނޭނގެއެވެ" 

ހުތުބާގައި ބުނީ މުއުމިނުންނަކީ އެންމެ ބޮޑެތި މުސީބާތްތަކުގެ ވަގުތުތަކުގައިވެސް ﷲ އަށް ގެ ރަހުމަތާއި ލުޔަށް އުއްމީދުކުރާ އެމީހުންގެ ހިތްތައް ޔަގީންކަމުން ފުރިފައިވާ ބައެއްކަމަށެވެ.