އިނގިރޭސި ޕްރިމިއާ ލީގްގައި ރޭ އާސެނަލް އާއި އިޕްސްވިޗް ބައްދަލުކުރިމެޗް އާސެނަލް ކާމިޔާބުކޮށް ރޭގެ މޮޅު، އެޓީމްގެ ލެޖެންޑް ސަންތި ކަޒޯލާއަށް ހާއްސަކޮށްފިއެވެ.

އާސެނަލްގެ އެމިރޭޓްސް ސްޓޭޑިއަމުގައި ކުޅުނު މިމެޗް އިޕްސްވިޗްގެ މައްޗަށް އެޓީމް ކުރިހޯދީ 0-1 ގެ ނަތީޖާއަކުންނެވެ. އާސެނަލުން ޑޮމިނޭޓްކުރި މިމެޗް ފަށައިގެން އެންމެ ރަނގަޅު ފުރުސަތެއް ލިބުނީ ޓިމްބާ އަށެވެ. ނަމަވެސް ޕެނަލްޓީ އޭރިއާ ބޭރުން އޭނާއަށް ބޯޅަ ފޮނުވާލެވުނީ ސީދާ ކީޕަރުހުރި ދިމާލަށެވެ.

މެޗްގައި ފެނިގެންދިޔަ ހަމައެކަނި ގޯލް އާސެނަލަށް ކާމިޔާބުކޮށްދިނީ ހާވަރޓެޒް އެވެ. މެޗްގައި މީގެ އިތުރުންވެސް އާސެނަލަށް ލަނޑުޖަހާނެ ރަނގަޅު ފުރުސަތުތައް ވަނީ ލިބިގެންގޮސްފައެވެ. މީގެ ތެރޭގައި ގެބްރިއަލް އަދި އޮޑިގާޑު ފޮނުވާލި ހަމަލާތައް ފާހަގަކޮށްލެވެއެވެ. ރޭގެމެޗްގައި އާސެނަލްގެ ކުޅުންތެރިން ފޮނުވާލި ގިނަ ހަމަލާތައް ދިފާއިކުރުމުގައި އިޕްސްވިޗްގެ ކީޕަރު މުރިޗް ވަނީ ފާހަގަކޮށްލެވޭ ސޭވްތަކެއް ކޮށްފައެވެ. ރޭގެ މެޗުން ލިބުނު މޮޅާއެކު އާސެނަލްއަށް ވަނީ ތާވަލްގެ ދެވަނަ ލިބިފައެވެ. އެއްވަނައިގަ އަދިވެސް އުޅެނީ ލިވަޕޫލެވެ.

ރޭ އިޕްސްވިޗްއަތުން ލިބުނު މޮޅު އާސެނަލުން ހާއްސަކުރީ އެޓީމްގެ ކުރީގެ ލެޖެންޑް އަދި ކެޕްޓަނެއްގެ ގޮތުގައި ފެނިގެންދިޔަ ސަންތި ކަޒޯލާއަށެވެ. އޭނާ އާސެނަލްގެ މެޗެއް ބަލާލުމަށް އެބުރި އެމިރޭޓްސް ސްޓޭޑިއަމަސް ޒިޔާރަތްކޮށްފައިމިވަނީ 7 އަހަރަށްފަހުއެވެ.  ކަޒޯލާ 2018 ވަނަ އަހަރު އާސެނަލް ދޫކޮށްލިފަހުން އެމިރޭޓްސް ސްޓޭޑިއަމަށް އައިސްފައެއް ނުވެއެވެ. 

މެޗްގެ ކުރިން ކަޒޯލާ، އާސެނަލްގެ ކޯޗް މިކޭލް އަޓޭޓާ އާއެކު. ފޮޓޯ: އާސެނަލް

މެޗްގެ ކުރިން ޕްރިމިއާ ލީގް ޓީވީއާ ވާހަކަދައްކަމުން ކަޒޯލާ ބުނީ އަހަރުތަކަކަށްފަހު އާސެނަލްގެ މެޗެއް ބަލާލުމަށް އާދެވުނީތީ ނިހާޔަތަށް އުފާކުރާކަމަށާއި، ދުރުގައި ހުރިނަމަވެސް ޓީމަށް ދެވިފައިވާ ގަދަރާއި އިހުތިރާމް އަދިވެސް އެބައޮތްކަމަށެވެ. މިކޭލް އަޓޭޓާގެ ދަށުން އާސެނަލަށް ބޮޑެތި ކުރިއެރުންތަކެއް ލިބިފައިވާކަން ފާހަގަކުރަމުން ކަޒޯލާ ބުނީ ޕްރިމިއާ ލީގް ކާމިޔާބުކުރުމުގެ ފެންވަރު އެޓީމުގެ އެބައޮތް ކަމަށާއި އުއްމީދަކީ އާސެނަލުން މިފަހަރުގެ ލީގް ނެގުން ކަމަށެވެ. 

ކަޒޯލާ ވަނީ 2012 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް އާސެނަލަށް ކުޅެފައެވެ. އޭނާ އާސެނަލް ދޫކޮށްލާފައިވަނީ ފައިތިލަޔަށް ލިބުނު އަނިޔާގެ ސަބަބުން، ފަރުވާހޯދަން ކުޅުމުން ބޭރުގައި ދިގު މުއްދަތަކަށް ހުންނަންޖެހުމުންނެވެ.