މާލޭގެ ގެއެއްގެ ބޮންޑެޑް ވެއާހައުސްއެއްގައި ބަހައްޓާފައިހުރި ސިނގިރޭޓް ކާޓޫނުތަކެއް ގެއްލުނު މައްސަލައެއް ފުލުހުން ބަލަން ފަށައިފިއެވެ.

ބައެއް މީޑިއާތަކުން ރިޕޯޓްކޮށްފައިވާ ގޮތުގައި ގެއްލިފައިވަނީ 575 ކޭސް ސިނގިރެޓެވެ. އެއީ 34،000 ކާޓޫނެވެ. އެ ސިނގިރޭޓް ތައް ގެއްލިފައިވަނީ ދުންފަތުގެ ބާވަތްތަކުން ނަގާ ޑިއުޓީ ބޮޑުކުރިފަހުންނެވެ. މައުލޫމާތު ލިބިފައިވާ ގޮތުގައި ގެއްލިފައިވާ ސިނގިރޭޓް ކާޓޫނުތަކަށް ކަސްޓަމް ޑިއުޓީ ދައްކަންޖެހޭއިރު، އެތަކެއްޗަށް ދައްކަންޖެހޭ ޑިއުޓީގެ އަދަދު 47 މިލިއަން ރުފިޔާއަށް އަރައެވެ. 

މިކަމާ ގުޅިގެން ދާހިލީ ވަޒީރު އަލީ އިހްސާން އެކްސްގައި ކުރެއްވި ޕޯސްޓެއްގައިވަނީ މާލޭގެ ވެއާހައުސްއެއްގައި ހުރި ސިނގިރޭޓްތަކެއް ގެއްލުނު މައްސަލައެއް ފުލުހުން ބަލަމުން އަންނަކަމަށް ވިދާޅުވެފައެވެ.

Advertisement

މާލޭގެ ގެތަކުގައި ހުންނަ ބޮންޑެޑް ވެއާހައުސްތައް ހުންނަނީ ކަސްޓަމްސްގެ ބެލުމުގެ ދަށުން ނޫނީ އެތަނުން އެއްޗެހި ބޭރުނުކުރެވޭ ގޮތަށެވެ.

މިކަމާ ގުޅިގެން އެކްސްގައި ކުރެއްވި ޕޯސްޓްގައި ވަޒީރު ވިދާޅުވީ، ވެއާ ހައުސްގެ ވެރިފަރާތުން ވެއާހައުސް ދޫކޮށް އެތަނުގައި އެހެން މަސައްކަތެއް ކުރަމުންގެންދާކަމުގެ މައުލޫމާތު ލިބުމުން އެކަން ޔަގީންކޮށް، ވެއާހައުސްގައި ޑިއުޓީ ދައްކަންޖެހޭކަމަށް ކަސްޓަމްސްގެ ރެކޯޑްތަކުން ދައްކާ މުދަލަށް ޑިއުޓީ ދެއްކުމަށް އެފަރާތަށް އަންގާފައިވާކަމަށެވެ. އަދި ކަސްޓަމްސްއަށް އެންގުމެއްނެތި އެކަންކޮށްފައިވާތީވެ، ކަސްޓަމްސް އާއި ފުލުހުން އެކަން ހިނގާދިޔަގޮތް ބަލައި ތަހުގީގުކުރަމުންދާކަމަށްވެސް އިހުސާން ވިދާޅުވިއެވެ.

އިހުސާން ވިދާޅުވީ އެގޮތަށް ގޭތަކުގައި މުދާ ބޮންޑުކޮށްގެން ގެންގުޅުމަކީ ރައްކާތެރި އަދި ސަލާމަތީގޮތުން އެންމެ ރަނގަޅުގޮތްކަމަށް ނުފެންނާތީވެ، ބޮންޑެޑް ވެއާ ހައުސްތައް ހިންގުމަށް އޮންނަ އުސޫލު މި ސަރުކާރުން ހަރުދަނާކޮށްފައިވާކަމަށެވެ. މިގޮތުން މިހާރު ބޮންޑެޑް ވެއާހައުސްތައް ހިންގޭނީ ކަސްޓަމްސްގެ ފުލް ކޮންޓްރޯލް އޮންނަ ސަރަހައްދުތަކުގައި އެކަނިކަމަށް ކަނޑައަޅައި އެކުލަވާލި އެ އުސޫލަށް އަމަލުކުރަމުން އަންނަކަމަށް މިނިސްޓަރު ވަނީ ވިދާޅުވެފައެވެ.