މި ސަރުކާރުން އިދިކޮޅު ފަރާތްތަކުގެ މައްސަލަތައް ބަލަނީ ސަރުކާރަށް ކުރާ ތުހުމަތުތައް އޮއްބާލަންކަމަށް އެމްޑީޕީން ބުނެފިއެވެ.

އެމްޑީޕީން މިފަދައިން ބުނީ  ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) ގެ ކުރީގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) ދިރިއުޅޭގެ ބުރާސްފަތި ދުވަހުގެރޭ ދަންވަރު ކޯޓު އަމުރެއްގެ ދަށުން ފުލުހުން ފާސްކުރުމާ ގުޅިން ނެރުނު ނޫސްބަޔާނެއްގައެވެ.

މިގޮތުން އެމްޑީޕީން ބުނީ، ރޭގަނޑު ދަންވަރު މޫކޭގެ ގެއަށް ފުލުހުން ވަނުމަކީ ސަރުކާރުން އިދިކޮޅު މެންބަރުންނަށް އިންޒާރު ދިނުމަށް ކުރިއަށްގެންދާ ޓްރެންޑެއްގެ ތެރެއިން ކުރިކަމެއްކަމަށެވެ.

Advertisement

ރައީސް ޑރ.މުޢިއްޒުގެ ސަރުކާރުން އިދިކޮޅު މެންބަރުންނާ ފުރުއްސާރަ ކުރަމުންދާ ކަމަށާއި، ސަރުކާރުން މަސައްކަތްކުރަނީ ބާރުގެ ބޭނުންކޮށްގެން ހިޔާލުފާޅުކުރުމުގެ މިނިވަންކަމާ ޑިމޮކްރަސީއަށް ހުރަސްއަޅަން ކަން ފާހަގަކޮށް އެމްޑީޕީން ބުނީ، މިކަމުގެ ސަބަބުން, ރައީސް ޑރ.މުޢިއްޒުގެ ވެރިކަމުގައި ރާއްޖޭގައި ޑިމޮކްރަސީ އާއި އަސާސީ ހައްގުތައް ގެއްލެމުންދާތީ ރައްޔިތުން ކަންބޮޑުވާކަމަށެވެ.

އެމްޑީޕީގެ މެމްބަރުންނަށާއި އިދިކޮޅު އެހެން މެންބަރުންނަށް ފުރައްސާރަކޮށް ދޮގު ވާހަކަތައް ސަރުކާރުން ފަތުރަމުންދާކަމަށް ތުހުމަތުކޮށް އެމްޑީޕީން ވަނީ އެޕާޓީއަށް އަމާޒުކޮށް ސަރުކާރުން ބަލަމުންދާ މައްސަލަތަކަށް އަލިއަޅުވާލާފައެވެ. އެއީ:

1) ކުރީ ސަރުކާރުގައި ދައުލަތުން ބަދަލުގެ ގޮތުގައި އެކި ފަރާތްތަކާއެކު ހެދިފައިވާ ބަދަލުގެ އެއްބަސްވުންތަކާ ގުޅިގެން ކުރީގެ ރައީސް ސޯލިހާއި، ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕަސަން ފައްޔާޒު އިސްމާއިލްގެ އިތުރުން ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްސަލަ ބަލަން އެންގުން.

2) ކޮރަޕްޝަންގެ ތުހުމަތަކާ ގުޅިގެން އޭސީސީ އިން ފަށާފައިވާ ތަހުގީގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން އާއި ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހުމަދު ސައީދުގެ ޕާސްޕޯޓް ހިފެހެއްޓުން.

3) ސޯޝަލް މީޑިއާގައި ކުރި ޕޯސްޓަކާއި ގުޅިގެން އެމްޑީޕީގެ އެކްޓިވިސްޓު ހުސައިން ޝާފިއު ފުލުހަށް ހާޒިރު ކުރުން.

4) އެމްޑީޕީ ޖަލްސާއެއްގައި ދެއްކި ވާހަކައަކާ ގުޅިގެން ފައްޔާޒަށް ފިޔަވަޅު އަޅާނެކަމަށް ބުނެ އިންޒާރު ދިނުން.

މިއާއިއެކު އެމްޑީޕީން ބުނީ، ކޮރަޕްޝަންގެ މައްސަލަތައް ބެލުމުގައި ފުލުހުން ބޭއިންސާފުން އަމަލު ކުރަމުންދާކަމަށާއި، އިދިކޮޅު ފަރާތްތަކުގެ މައްސަލަތައް ބަލަނީ މި ސަރުކާރަށް ކުރާ ކޮރަޕްޝަންގެ ބޮޑެތި ތުހުމަތުތައް އޮއްބާލަން ކަމަށެވެ.

އޭގެ ތެރޭގައި، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ދައުލަތުގެ ފައިސާ ނަހަމަ ގޮތުގައި ބޭނުންކުރުމާއި މާލެ ސަރަހައްދުން ބިން ވިއްކުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކޮރަޕްޝަން ހިންގި ކަމަށް ތުހުމަތުކުރެވޭ މައްސަލަ އެމްޑީޕީން ފާހަގަކުރިއެވެ.

މި މައްސަލަތައް ބެލުމަށް އެމްޑީޕީގެ ފަރާތުން އޭސީސީ އާއި ފުލުހުގައި އެދިފައިވާނެކަމަށް ބުނެ އެމްޑީޕީން ވަނީ މި ކަންކަން ރައީސް ޑރ.މުޢިއްޒަށް އެނގިވަޑައިގެން އެކަމުގައި އެމަނިކުފާނުވެސް ބައިވެރިވެވަޑައިގެންނެވިކަމަށް ވެސް ތުހުމަތުކޮށްފައެވެ.