ޗައިނާ ސަރުކާރާއި ދިވެހިރާއްޖެއާ ދެމެދު ގާއިމްކުރި މިނިވަން ވިޔަފާރީގެ އެއްބަސްވުމަށް ރަސްމީގޮތުން އަމަލުކުރުން މިއަދު އިފްތިތާހުކޮށްފިއެވެ.
މިކަމާގުޅޭގޮތުން މީރުމާގައި ބޭއްވި ރަސްމިއްޔާތެއްގައި ރަސްމިއްޔާތުގައި ރާއްޖޭގެ ފަރާތުން ރަސްމިއްޔާތު ޝަރަފްވެރިކޮށްދެއްވީ އިކޮނޮމިކް މިނިސްޓަރު މުހައްމަދު ސައީދެވެ. ޗައިނާގެ ފަރާތުން އެޤައުމުގެ ކޮމާސް މިނިސްޓަރު ވަންގް ވެންޓާއޯއެވެ. މި ރަސްމިއްޔާތު ކުރިއަށްގެންދިޔައީ، އޮންލައިނުކޮށެވެ.
ޗައިނާ އާއި ރާއްޖެއާ ދެމެދު ވެވުނު މިނިވަން ވިޔަފާރީގެ އެއްބަސްވުމަށް އަންނަ ޖެނުއަރީމަހުގެ އެއްވަނަ ދުވަހު އަމަލުކުރަން ފެށުމަށް ނިންމިއިރު، މި އެއްބަސްވުމަކީ ކުރީގެ ރައީސް ޔާމީނުގެ ދުވަސްވަރު އެކުލަވާލެވުނު އެއްބަސްވުމެކެވެ. އޭރުވެސް ފްރީޓްރޭޑް އެއްބަސްވުން އެކުލަވާލުމުގައި އެންމެ އިސްކޮށް ހުންނެވީ މިހާރުގެ އިކޮނޮމިކް މިނިސްޓަރު މުހައްމަދު ސައީދެވެ.
ޗައިނާ ސަރުކާރާއި ދިވެހިރާއްޖެއާ ދެމެދު ގާއިމްކުރި މިނިވަން ވިޔަފާރީގެ އެއްބަސްވުމަށް ރަސްމީގޮތުން އަމަލުކުރުން އިފްތިތާހުކުރުމަށް ބެއްވި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، މި އެއްބަސްވުމާއެކު ޗައިނާއިން ރާއްޖެއަށް އެތެރެކުރާ 290 އަށްވުރެ ގިނަ މުދަލުން ނަގާ ޑިއުޓީ މައާފްވެގެން ދާނޭކަމަށެވެ. މިގޮތުން ފަރުނީޗަރާއި، އިލެކްޓްރޯނިކް އައިޓަމްގެ އިތުރުން މެޝިނަރީން ނަގާ ޑިއުޓީވެސް މައާފްވެގެންދާނެއެވެ.
މިނިސްޓަރު ސައީދު ވިދާޅުވީ ފްރީޓްރޭޑް އެއްބަސްވުމުގެ ދަށުން ގެންނަ މުދަލުގެ ޑިއުޓީ މައާފްވެ އެ މުދަލުން މީގެކުރިން ދައުލަތަށް ލިބެމުން އައި އާމްދަނީ އުނިވިނަމަވެސް، ޑިއުޓީ މައްާފްކުރުމުން ރައްޔިތުންނަށް އޭގެ މަންފާލިބި އިގްތިސާދުގެ އެކި ދާއިރާތަކަށް އެކަމުގެ ކުރިއެރުންތައް ލިބިގެންދާނެއެވެ. މިސާލެއްގެ ގޮތުގައި މިނިސްޓަރު ނެންގެވީ ޗައިނާއިން ގެސްޓްހައުސް ވިޔަފާރިއަށް ގެންނަ ފަރުނީޗަރުން ޑިއުޓީ މައާފްކުރުމުން މާލީގޮތުން އެކަމުގެ ލުއިކަން އެ ގެންނަ ފަރާތްތަކަށް ލިބިގެންދާއިރު، އެތަކެތި ރާއްޖެ ގެނައުމަށްފަހު ދެން އެތަކެތި އުފުލުމަށް ކުރާ ހޭދައާއި އެނޫންވެސް ކަންކަމުން ދައުލަތަށް އާމްދަނީ ލިބިގެންދާނޭކަމެވެ.
ޗައިނާ އާއި ރާއްޖެއާ ދެމެދު ވެވުނު މިނިވަން ވިޔަފާރީގެ އެއްބަސްވުމުގެ ސަބަބުން ދިވެހިންނަށް ލިބިގެންދާ އެންމެ ހާއްސަ އެއްކަމަކީ، ޗައިނާގެ ބޮޑެތި ސިޓީތައް ނުވަތަ ޗައިނާގެ މާކެޓުގައި ދިވެހިންނަށް ވިޔަފާރިކުރަން ފުރުސަތުތައް ލިބި، އެހެންގައުމުގެ މާކެޓްތަކަށް ވަނުމުގެ ފުރުސަތު ލިބިގެންދިއުމެވެ.
ޗައިނާ އާއި ރާއްޖެއާ ދެމެދު ގާއިމްކުރި މިނިވަން ވިޔަފާރީގެ އެއްބަސްވުން އެކުލަވާލައި ނިމުނީ، ރައީސް ޔާމީނުގެ ދައުރު ނިމެން އުޅެނިކޮށެވެ. ޖެހިގެން އައި ރައީސް އިބްރާހިމް މުހައްމަދުގެ ސަރުކާރުން އެ އެއްބަސްވުން ކުރިއަށް ގެންގޮސްފައި ނުވާއިރު، އޭރު މަޖިލީހުގެ ރައީސަކަށް ހުންނެވި ރައީސް ނަޝީދު ވިދާޅުވެފައިވަނީ ރާއްޖެއާ ޗައިނާ އާ ދެމެދު މިނިވަން އެއްބަސްވުމެއް އެކުލަވާލާފައި ނުވާކަމަށެވެ. މައުލޫމާތު ލިބިފައިވާ ގޮތުގައި ޗައިނާ އާއެކު ގާއިމްކުރި މިނިވަން އެއްބަސްވުން ކުރިއަށްގެންގޮސްފައި ނުވަނީ އިންޑިއާއިން އެ އެއްބަސްވުމާމެދު ނުރުހުމުންނެވެ.
ނަމަވެސް ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެން ނިންމަވާފައިވަނީ، އެ އެއްބަސްވުމަކީ ދިވެހިންނަށް މަންފާކުރަނިވި އެއްބަސްވުމަކަށްވާތީވެ، އެ އެއްބަސްވުން ކުރިއަށްގެންގޮސް ތަންފީޒުކުރުމަށެވެ.
Advertisement
This content is created and paid for by advertisers and does not involve Voice Journalists
