އަވައްޓެރި އިންޑިއާއިން ރާއްޖޭގެ ވެރިކަމުގައި ހުންނެވި ވެރިއަކު މަގާމުން ދުރުކުރުމަށް މަސައްކަތް ނުކުރާނޭކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިގޮތަށް ވިދާޅުވެފައިވަނީ، ރައީސް ޑރ.މުއިއްޒުގެ ވެރިކަން ވައްޓާލުމަށް 87 މިލިއަން ރުފިޔާ ދިނުމަށް އިދިކޮޅު ފަރާތްތަކުން އިންޑިއާގައި އެދިފައިވާކަމަށް ވޮޝިންޓަން ޕޯސްޓުގައި ޝާއިއުކުރި ހަބަރަކާ ގުޅިގެންނެވެ. މި ހަބަރާ ގުޅިގެން ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، ވޮޝިންޓަން ޕޯސްޓްގެ އެ ލިޔުން ވަރަށް ޝައުގުވެރިކަމާއެކު އެމަނިކުފާނު ކިޔުއްވާފައިވާކަމަށެވެ. ރައީސް ނަޝީދު ވިދާޅުވީ، އިންޑިއާއިން އައީ އަބަދުވެސް ދިވެހިންގެ ޑިމޮކްރަސީއަށް ތާއީދުކުރަމުން ކަމަށާއި، އެފަދަ ކަމަކަށް އިންޑިއާއިން ތާއީދެއް ނުކުރާނޭ ކަމަށެވެ. އަދި އިންޑިއާގެ ފަރާތުން ދުވަހަކުވެސް އެފަދަ ހުށަހެޅުމެއް އައިސްފައިވެސް ނުވާކަމަށެވެ.

ރައީސް ނަޝީދު ވިދާޅުވީ ރައީސް ޑރ.މުއިއްޒުގެ ވެރިކަން ވައްޓާލުމަށް ދުވަހަކުވެސް ބަޔަކު ރޭވިކަމުގެ މައުލޫމާތު ލިބިވަޑައިގެންފައި ނުވާކަމަށާއި، އެކަހަލަ ސީރިއަސްކަމެއް ކުރަން އުޅުނުކަން އެނގިވަޑައިގެންފައި ނުވާކަމަށެވެ. 

އެމެރިކާގެ ނޫހެއް ކަމަށްވާ ވޮޝިންގްޓަން ޕޯސްޓުގައި ބުނެފައިވަނީ، މި އަހަރުގެ ޖަނަވަރީ މަހު، އިންޑިޔާގެ އިންޓެލިޖެންސް އޭޖެންސީ އާރްއޭޑަބްލިއުގެ އޭޖެންޓުން ދިވެހިރާއްޖޭގެ އިދިކޮޅު ފަރާތްތަކާއެކު ރައީސް މުޢިއްޒުގެ ވެރިކަން ވައްޓާލުމަށް މަޝްވަރާތައް ފެށި ކަމަށް މި މަޝްވަރާތަކުގައި ބައިވެރިވި ބައެއް ފަރާތްތަކުން ބުނެފައިވާ ކަމަށެވެ. މި މަޝްވަރާތަކުގެ ތެރެއިން "ޑިމޮކްރެޓިކް ރިނިއުވަލް އިނީޝިއޭޓިވް" ގެ ނަމުގައި ޕްލޭނެއް އެކުލަވާލާފައިވާކަމަށްވެސް ބުނެފައިވެއެވެ.

މި ޕްލޭންގައި ހިމެނެނީ ރައީސް މުޢިއްޒުގެ ޕާޓީގެ މެންބަރުންވެސް ހިމެނޭ ގޮތަށް 40 މަޖިލިސް މެންބަރުންނަށް ރިޝްވަތު ދީގެން ރައީސް މުޢިއްޒުގެ މައްޗަށް އިތުބާރު ނެތް ކަމުގެ ވޯޓެއް ނެގުމަށް ކަމަށް ދަ ޕޯސްޓުގައި ބުނެފައިވެއެވެ. މީގެ އިތުރުން، 10 އިސް ސިފައިންނާއި ފުލުހުންނަށާއި، ބާރުގަދަ 3 ގޭންގަކަށް ފައިސާ ދީގެން ރައީސް މުޢިއްޒުގެ ވެރިކަން ވައްޓާލުމަށް މަގުފަހިކުރުމަށް ރޭވިކަމަށްވެސް ބުނެފައިވެއެވެ.

މި ޕްލޭން ތަންފީޒުކުރުމަށް 87 މިލިއަން ރުފިޔާ (6 މިލިއަން ޑޮލަރު) ބޭނުންވާނެކަމަށް ލަފާކޮށްފައިވާއިރު، މި ފައިސާ ހޯދާނީ އިންޑިޔާއިން ކަމަށް ދިވެހި ދެ އޮފިޝަލަކު ބުނެފައިވާކަމަށް ވޮޝިންގްޓަން ޕޯސްޓުން ހާމަކޮށްފައިވެއެވެ.