ދަނާލު މަޝްރޫއު ކުރިއަށްގެންދާ ރަށްތަކުން މިހާރު ބިން ހަމަޖެހިފައިވާކަމަށް މަތީ ތަޢުލީމާ މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ބުނެފިއެވެ.
ކުރިއަށް އޮތް 5 އަހަރު ތެރޭގައި ރ. ދުވާފަރު، ރ. ހުޅުދުއްފާރު، ގއ. ވިލިނގިލި އަދި ފުވައްމުލައް ސިޓީގައި ދަނާލު އަޅަން ސަރުކާރުން ނިންމާފައިވާއިރު، މިކަމާއި ގުޅޭގޮތުން ދައުލަތުގެ މީޑިއާ، ޕީއެސްއެމަށް މައުލޫމާތުދެމުން އެ ވުޒާރާގެ ސްޓޭޓް މިނިސްޓަރ އަޙްމަދު ޝަފީއު ވިދާޅުވީ މި މަޝްރޫއު ކުރިއަށްގެންދާ ރަށްތައް ކަނޑައަޅާފައިވަނީ އެކަމަށް އެދިފައިވާ ރަށްތައް ބަލައިގެންކަމަށެވެ.
ޝަފީއު ވިދާޅުވީ، މާބޮޑެތި އިމާރާތްތަކެއް ހެދުމުގެ ވިސްނުން ނެތްކަމަށާއި، އިމާރާތްތައް އެޅުމުގައި އެ ރަށެއްގެ ކުޑަބޮޑު މިނާއި، އެ ސަރަޙައްދަކުން ކުދިން އަންނާނެ ވަރަށް ބަލާނެ ކަމަށެވެ.
"އެކި ރަށްތަކުގައި މިހުރި އެކިވަރުގެ މަޝްރޫޢުތައް. އަޅުގަނޑުމެންގެ ވިސްނުމެއް ނެތް މާބޮޑެތި އިމާރާތްތަކެއް ހަދަން. އެ ރަށެއްގެ ކުޑަބޮޑު މިނާ އެ ސަރަޙައްދަކުން ކުދިން އަންނާނެ ވަރަކަށް ބަލައިގެން ކުރިއަށް ގެންދިޔުން. ކިޔަވައިދޭނެ ވަޞީލަތްތައް، ކޮޓަރިތަކާއި ކްލާސްރޫމްގެ ގޮތުގައި ބެނުންކުރެވޭނެ ތަންތަން ޤައިމްކުރާނެ."
ޝަފީއު ވިދާޅުވިއެވެ.
ދަނާލުތައް ތަރައްޤީކުރުމަށް ބޭނުންވާ ބިންތައް ލިބިފައިވާކަން ފާހަގަކުރައްވާ ޝަފީއު ވިދާޅުވީ، މިފެށޭ އަހަރު ދަނާލުތައް ތަރައްޤީކުރުމުގެ އަމަލީ މަސައްކަތް ފަށާނެކަމަށެވެ.
Advertisement
This content is created and paid for by advertisers and does not involve Voice Journalists
