ގދ. ތިނަދޫއަށް ދީފައިވާ ސިޓީގެ ދަރަޖަ ބާތިލުކުރުމަށް އެދި ހުށަހެޅި މައްސަލަ ހައި ކޯޓުން ބޭރުކޮށްލައިފިއެވެ.
މިދިޔަ ނޮވެމްބަރު 21 ވަނަ ދުވަހު ހައިކޯޓަށް މިމައްސަލަ ހުށަހެޅުއްވީ ގާނޫނީ ވަކީލް އަދި ކުރީގެ ޑެޕިއުޓީ މިނިސްޓަރު މުހައްމަދު ރާގިބު އަހްމަދު އެވެ.
އެފަދައިން އެމައްސަލަ ހުށަހަޅާފައިވަނީ އެ ރަށުގައި 10000 މީހުން ހަމަ ނުވާކަމަށް ބުނެ އެވެ.
މި މައްސަލައިގައި ހައި ކޯޓުގެ ރަޖިސްޓްރާ މަރިޔަމް ހޫރުޝީދާގެ ނިންމެވުމުގައިވަނީ ތިނަދޫއަށް ސިޓީއެއްގެ ދަރަޖަ ދިނުމަށް ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ނެރުއްވި ގަރާރަކީ މަޖިލީހުން ފާސްކޮށްފައިވާ މަސްދަރެއް ނުވަތަ ގާނޫނަކުން ބާރުލިބިގެން އެ ގާނޫނުގެ އިމުގެ ތެރެއިން އެކުލަވާލާފައިވާ މަސްދަރެއްކަން ރާގިބް ހުށަހެޅުއްވި މައްސަލައިގައި ބުނެދެވިފައި ނުވާ ކަމަށެވެ.
ވުމާއެކު އެއީ ދުސްތޫރީ މައްސަލައެއްގެ ގޮތުގައި ބެލެން ނެތުމުން ހައި ކޯޓަށް މައްސަލަ ބަލައިގަނެވެން ނެތް ކަމަށެވެ.
ރަޖިސްޓްރާގެ ނިންމުމާ މެދު ހިތްހަމަނުޖެހޭނަމަ ހައިކޯޓުގެ ފަނޑިޔާރުންގެ މަޖިލީހަށް އެ މައްސަލަ މުރާޖައާ ކުރުމަށް ހުށަހެޅޭ އެވެ.
ގދ. ތިނަދޫ އަށް ސިޓީ އެއްގެ ދަރަޖަ ދީފައިވަނީ 31 އޮގަސްޓް 2023 ގައެވެ. އެކަން ކުރީގެ ރައީސް އިބްރާހިމް މުހައްމަދު ސޯލިހު އިއުލާން ކުރެއްވީ އެ މަނިކުފާނުގެ ރިޔާސީ ކެމްޕެއިންގެ ތެރެއިން ތިނަދުއަށް ވަޑައިގެން ބޭއްވި ޕާޓީ ޖަލްސާއެއްގައެވެ.
Advertisement
This content is created and paid for by advertisers and does not involve Voice Journalists
