ސަރުކާރު ކުންފުނިތަކުން ލޯނު ނަގާއިރު، މާލީ ވުޒާރާގެ ހުއްދަ ހޯދަންޖެހޭގޮތަށް ހަމަޖައްސައިފިއެވެ.
މިކަން މިގޮތަށް ހަމަޖެއްސިކަން ކުންފުނިތަކަށް އަންގާފައިވަނީ، ސަރުކާރު ކުންފުނިތަކުގެ ބަލަދުވެރިފަރާތް ކަމަށްވާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އެކުލަވާލައި ނެރެފައިވާ އައު އުސޫލުގައެވެ. ޕީސީބީން އެކުލަވާލި އައު އުސޫލުގައި ބުނެފައިވަނީ، ސަރުކާރު ކުންފުންޏަކުން ލޯނު ނެގުމަށް ބޭނުންވެއްޖެ ނަމަ އުސޫލުގައިވާ ކަންކަން ފުރިހަމަ ކުރުމަށްފަހު އެ ކުންފުންޏެއްގެ ބޯޑުން ނިންމަިއ ހިއްސާދުންގެ ހުއްދައަށް އެދި ފޮނުވަން ޖެހެއެވެ. އަދި އެ ހުއްދަ ލިބުމުން ހުއްދަ ލިބޭތާ 5 ދުވަހުގެ ތެރޭގައި އެކަން ޕީސީބީއަށް އަންގަންޖެހެއެވެ.
ޕީސީބީން ވަނީ ދައުލަތުގެ އެހެން ތަންތަނުންވެސް ލޯނު ނެގުމުގައި އެ އުސޫލުގައިވާ ކަންކަން ފުރިހަމަ ކުރުމަށްފަހު ހިއްސާދާރުންގެ ހުއްދަ ހޯދުމަށް އެދިފައެވެ. ސަރުކާރު ކުންފުނިތަކުގެ ހިއްސާދާރަކީ މިނިސްޓްރީ އޮފް ފައިނޭންސްއެވެ.
ސަރުކާރު ކުންފުނިތަކުން މީގެ ކުރިން ލޯނު ނެގުމާއި، ބޯނަސްދިނުން ފަދަ ކަންކަމުގައި ހުއްދައަށް އެދެންޖެހެނީ ޕީސީބީއަށެވެ. ނަމަވެސް އައު އުސޫލާއެކު ދެން އެކަންކަމުގައި ހުއްދައަށް އެދެން ޖެހޭނީ ފިނޭންސްއަށެވެ. ޕީސީބީން ބުނެފައިވަނީ، އައު އުސޫލެއް އެކުލަވާލުމުގެ މައިގަނޑު މަގްސަދަކީ ވިޔަފާރީގެ އުސޫލުން ހިންގާ ސަރުކާރުގެ ތަންތަނުގެ ހިންގުން އިތުރަށް ހަރުދަނާކުރުމަށް މަގުފަހިކުރުމާއި، ކޯޕަރޭޓް ގަވަރނަންސްގެ ހަމަތައް ނެގެހެއްޓުންކަމަށެވެ.
Advertisement
This content is created and paid for by advertisers and does not involve Voice Journalists
