އިތުރު ޑްރެޖަރުތައް ގެނެސް ރަސްމާލެ ހިއްކުމުގެ މަސައްކަތް އަވަސްކުރުމަށް ނިންމާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ގުޅިއަށް ވަޑައިގެން މިއަދު އެރަށުގެ ރައްޔިތުންނާ ބައްދަލުކުރައްވައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، މާލެ ކައިރީ ކުރިއަށްގެންދިއުމަށް ހަމަޖެހިފައިވާ ރަސްމާލެ މަޝްރޫޢުވެގެންދާނީ، އެއް ސަރަހައްދަކުން ބޯހިޔާވަހިކަމުގެ މައްސަލަތަކަށް ހައްލު ލިބިގެންދާނޭ އަހަރުކަމަށެވެ. ރައީސް ވިދާޅުވީ ރަސްމާލެ ސަރަހައްދު ވެގެންދާނީ އެއް ފަސްގަނޑެއްގައި އެންމެގިނަ މީހުން ދިރިއުޅޭނެ މަޝްރޫޢުއަށްކަމަށެވެ.

ރައީސް ވިދާޅުވީ ރަސްމާލެ މަޝްރުޢުގެ ބިންހިއްކުމުގެ މަސައްކަތް މިހާރު ކުރިއަށްދާއިރު، އިތުރު ޑްރެޖަރުތައް ގެނެސްގެން ރަސްމާލެ މަޝްރޫޢުގެ މަސައްކަތް އަވަސްކުރަމުން އަންނަ ކަމަށެވެ. ރައީސް ވިދާޅުވީ އިތުރު ޑްރެޖަރުތައް ގެނައުމާއެކު ރަސްމާލެ ހިއްކުމުގެ މަޝްރޫޢު ތިންގުނަ އަވަސްވެގެން ދާނޭކަމަށެވެ.

ރައީސް ވިދާޅުވީ މިދިޔަ އަހަރުގެ ތެރޭގައި ތަފާތު އެކި ސަބަބުތައް މެދުވެރިވެގެން ރަސްމާލެ މަޝްރޫޢުގެ މަސައްކަތް އެންމެ އެދެވޭގޮތަށް ކުރިއަށް ގޮސްފައިނުވާކަމަށެވެ. އެހެން އެވީ ވާރުތަވި އިގްތިސާދީ މައްސަލަތަކުގެ ތެރެއިން ކަންކަން ހައްލުކުރަމުންދިޔައިރު ކުރިމަތިވި ގޮންޖެހުންތަކުގެ ސަބަބުންކަމަށް ރައީސް ފާހަގަކުރެއްވިއެވެ.

ރައީސް ވިދާޅުވީ އޭރު ގޮންޖެހުންތައް ކުރިމަތިވި ނަމަވެސް މިހާރު އެކަމުން އަރައިގަނެ، މަޝްރޫޢުތަކުގެ މަސައްކަތް ފެށުމަށް ތައްޔާރުވަމުންދާކަމަށެވެ. ރައީސް ވިދާޅުވީ ރަސްމާލެ މަޝްރޫޢު ވެގެންދާނީ ބޯހިޔާވަހިކަމުގެ އިތުރުންވެސް، އިގްތިސާދީ އެކިއެކި ފަހި ފުރުސަތުތައް ތަނަވަސްވެގެންދާނެ މަޝްރޫޢުއަކަށް ކަމަށެވެ.

 ރަސްމާލެ ހިއްކުމުގެ މަސައްކަތް 12 ސަރަހައްދަކަށް ބަހާލައިގެން ކުރިއަށްގެންދިއުމަށް ނިންމާފައިވާއިރު، އޭރިއާ "ޖޭ" ގައި ހިއްކަންޖެހޭ ސަރަހައްދު އެއްކޮށް ހިއްކާ ނިމިފައިވާކަމަށް އެޗްޑީސީން ވަނީ ބުނެފައެވެ. އެއީ 29 ހެކްޓަރުގެ ސަރަހައްދެކެވެ. 

ރަސްމާލެ ހިއްކުމުގެ މަސައްކަތް މި ދޭތެރެއިން ހުއްޓިފައިވަނީ، ވެލި ލިބުމުގައި ހުރި ދަތިތަކާ ގުޅިގެން ނަމަވެސް، ރަސްމާލެ މަޝްރޫޢުއާ ގުޅޭ އެހެން މަސައްކަތްތައް ހުއްޓިފައި ނުވާކަމަށް އިމާރާތްކުރުމާ ބެހޭ ވަޒީރު މުއްތަލިބް ވަނީ މީގެކުރިން ވިދާޅުވެފައެވެ.

ފުށިދިއްގަރުފަޅު ހިއްކައިގެން ރަސްމާލެ ތަރައްގީ ކުރުމުގެ މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ. މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކާ 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ނިންމާފައެވެ.