މިދިޔަ ހުކުރުދުވަހު މާލެއަށްކުރި ވިއްސާރާގައި ފެންބޮޑުވެ، ގެއްލުންލިބުނު ތަންތަނުގެ ތެރެއިން 92 ގޭގެ އެސެސްމަންޓް ހަދައި ނިމިފައިވާކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ އޮފް މޯލްޑިވްސް އިން ބުނެފިއެވެ.
މިމަހުގެ 3 ވަނަ ދުވަހު މާލެއަށް ކުރި ވިއްސާރާގައި މިފަހަކަށް އައިސް ފެންބޮޑު ނުވާވަރަށް މަގުތަކުގައި ފެންބޮޑުވެ، ބައެއް ގެތަކަށް ފެންވަދެ އެކިވަރުގެ ގެއްލުންތައް ވަނީ ލިބިފައެވެ. މިކަމާ ގުޅޭގޮތުން އެންޑީއެމްއޭއިން އެކްސްގައި ކުރި ޕޯސްޓެއްގައި ބުނީ، ވިއްސާރައާއި ގުޅިގެން ޑެމޭޖް އެސެސްމަން ހަދަން ޖެހޭކަމަށް 137 ތަން ފާހަގަކުރެވުނު ކަމަށެވެ. ޑިޒާސްޓާއިން ބުނީ އޭގެ ތެރެއިން 92 ގޭގެ އެސެސްމަންޓް ވަނީ ނިމިފައެވެ. އަދި އެކި ސަބަބުތަކާއި ހެދި ނުނިމި ހުރި 45 ގޭގެ އެސެސްމަންޓް މާދަމާ ކުރިއަށް ގެންދިޔުމަށް ހަމަޖެހިފައިވާކަމަށް ޑިޒާސްޓާއިން ބުންޏެވެ.
މިކަމާ ގުޅޭގޮތުން މިރޭ ދައުލަތުގެ މީޑިއާގައި ވާހަކަދައްކަވަމުން ޑިޒާސްޓާ އޮފީހުގެ ޗީފް އެގްޒެކްޓިވް ހިސާން ހަސަން ވިދާޅުވީ ހުކުރުދުވަހު ކުރި ވިއްސާރާގައި ފެންބޮޑުވުމުގެ ސަބަބުން އެހީތެރިކަން ފޯރުކޮށްދިނުމަށް ގޮންޖެހުންތައް ކުރިމަތިވިކަމަށެވެ. މިގޮތުން ފެންބޮޑުވެފައި އޮތުމުން އެހީތެރިކަން ފޯރުކޮށްދިނުމަށް ދަތުރުކުރި ވެހިކަލަށް ދަތުރުކުރުމުގައި ދަތިތަކާ ކުރިމަތިވިކަން އޭނާ ވަނީ ފާހަގަކުރައްވާފައެވެ.
ހިސާން ވިދާޅުވީ ބެލެވޭގޮތުގައި ގެއްލުންވި ގެތަކުގެ އެސަސްމަންޓް ހެދުމުގެ މަސައްކަތް ނިމޭއިރު، ގެއްލުންވި ގެތަކުގެ އަދަދު އިތުރުވުން އެކަށީގެންވާކަމަށެވެ. އެއީ އެސަސްމަންޓް ހެދުމަށް ގެތަކަށް ޒިޔާރަތްކުރާއިރު ކައިރީގައި ހުންނަ ގެތަކުގެ ހާލަތުވެސް ދެނެގަންނާނޭކަމަށް ހިސާން ވިދާޅުވިއެވެ.
މާލެއަށް ކުރި ވިއްސާރައާގުޅިގެން 226 މީހުންނަށް ވަނީ ވަގުތީ ބޯހިޔާވަހިކަން ފޯރުކޮށްދީފައެވެ. ވިއްސާރައިގެ ސަބަބުން ފެންބޮޑުވެގެން އެކި އެކި އެހީތަކަށް އެދި 774 އަށްވުރެ ގިނަ ތަްތަނުން ރިޕޯޓްކޮށްފައިވާއިރު، މީގެ ތެރެއިން 554 ތަންތަނުން ވެލިބަސްތާ ޖެހުމަށް ވަނީ އެދިފައެވެ. މީގެ އިތުރުން އާއްމު ދިރިއުޅުމަށް ހުރަސްއެޅޭ ހާލަތަށްދިޔަ 36 ގޭބީސީގެ 226 މީހުންނަށް ވަގުތީ ބޯހިޔާވަހިކަމާއި ކެއިން ބުއިން ފޯރުކޮށްދީފައިވާކަމަށްވެސް ޑިޒާސްޓާ އޮފީހުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
