ށ.އަތޮޅުން ފެށިގެން ޅ.އަތޮޅަށް ޔެލޯ އެލާޓް ނެރެފިއެވެ.

މޫސުމާބެހޭ ޤައުމީ އިދާރާ، މޯލްޑިވްސް މީޓިއޮލޮޖިކަލް ސެންޓަރުން ބުނީ، މިރޭގެ 21:00 އިން ފެށިގެން ދަންވަރު 01:00 އާ ހަމަޔަށް ށ.އަތޮޅުން ފެށިގެން ޅ.އަތޮޅަށް ޔެލޯ އެލާޓް ނެރެފައިވާކަމަށެވެ. މެޓް އޮފީހުން ބުނީ ޔެލޯ އެލާޓް ނެރެފައިވާ ގަޑިތަކުގައި ބޯކޮށް ވާރޭވެހުމާއެކު، ގުގުރާނޭކަމަށް ލަފާކުރެވޭކަމަށެވެ. 

މެޓް އޮފީހުން ވަނީ މިރޭ 19:15 އިން ފެށިގެން 23:00 އާ ހަމަޔަށް ރ.އަތޮޅަށްވެސް ޔެލޯ އެލާޓް ނެރެފައެވެ. މޫސުމާ ބެހޭ އިދާރާއިން ބުނީ ރ.އަތޮޅަށް ޔެލޯ އެލާޓް ނެރެފައިވާ ވަގުތުތަކުގައި ބޯކޮށް ވާރޭވެހި ގުގުރައި، އަދި ވިލާގަނޑުގައި 45 މޭލަށް ވައިގަދަވެ، ކަނޑުތައްވެސް ގަދަވާނޭކަމަށް ލަފާކުރެވޭކަމަށެވެ.

މިދިޔަ ދުވަސްތަކުގައި ރާއްޖޭގެ އެކި ހިސާބުތަކަށް ކުރި ވިއްސާރާގައި ރާއްޖޭގެ ބައެއް ރަށްތަކަށް ވަނީ ފެންބޮޑުވެ އެކިވަރުގެ ގެއްލުންތައް ލިބިފައެވެ. ފެންބޮޑުވުމުގެ އިތުރުން ބައެއް ރަށްރަށަށް އުދަ އަރައިގެންވެސް ވަނީ ގެއްލުންތައް ލިބިފައެވެ.

މިފަހުން ކުރި ވިއްސާރާގައި އެންމެބޮޑު ގެއްލުމެއް މިފަހަރު ލިބުނު ރަށްތަކުގެ ތެރޭގައި ނަރުދޫ، ނިލަންދޫ، ކ.ގުރައިދޫ އަދި މަގޫދޫ ހިމެނެއެވެ. މީގެ އިތުރުން ހުކުރުދުވަހު ކުރި ވިއްސާރާގައި ފެންބޮޑުވެ، މާލޭގެ ބައެއް ގޭތަކަށްވެސް ވަނީ ފެންވަދެ ބޮޑެތި ގެއްލުންތަކެއް ލިބިފައެވެ.