ގުޅީފަޅުގެ މަގުތައް ތަރައްޤީކުރުމާއި މުނިސިޕަލް އިންފްރާސްޓްރަކްޗާގެ ޚިދުމަތްތައް ގާއިމް ކުރުމަށް, ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ)އާއި އެކު ސަރުކާރުން އެއްބަސްވުމުގައި ސޮއިކޮށްފިއެވެ.

މިކަމަށްޓަކައި ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައި ސަރުކާރުގެ ފަރާތުން ސޮއިކުރެއްވީ އިމާރާތްކުރުމާއި ގެދޮރުވެރިކަމާއި ބިނާރާއި ބެހޭ ވަޒީރު ޑރ.ޢަބްދުﷲ މުއްޠަލިބެވެ. ޗައިނާގެ ފަރާތުން ސޮއިކުރެއްވީ ސީއެމްއީސީގެ ރީޖަނަލް ޖެނެރަލް މެނޭޖަރ ކިއަން ހައޮޖުންއެވެ.

މި ރަސްމިއްޔާތުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އިތުރުން ނައިބު ރަައީސް އަލްއުސްތާޛް ހުސައިން މުހައްމަދު ލަތީފްވެސް ބައިވެރިވެވަޑައިގެންނެވިއިރު، ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުއްޠަލިބު ވިދާޅުވީ، މިއީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ސޮއިކުރެއްވި, އެއްބަސްވުމެއްގެ ދަށުން ކުރެވޭ މަސައްކަތެއް ކަމަށާއި، މިމަޝްރޫޢަކީ މާލެ ސަރަޙައްދުގެ ތޮއްޖެހުން ކުޑަކުރުމަށް އެމަނިކުފާނު ގެންގުޅުއްވާ ސިޔާސަތުގެ ދަށުން ކުރިއަށްގެންދަވާ މުހިންމު މަޝްރޫޢެއްކަމަށެވެ.

ސީއެމްއީސީއާއި އިންފްރާސްޓްރަކްޗަރު މިނިސްޓްރީއާ ދެމެދު ވަރަށް ގިނަ މަސައްކަތް ކުރެވިފައިވާ ކަން ފާހަގަކުރައްވާ މުއްޠަލިބް ވިދާޅުވީ، އޭގެ ތެރޭގައި ޕްރޮޖެކްޓު ސްކޯޕިން ތައްޔާރުކުރުމުގެ އިތުރުން، ޓެކްނިކަލް ސްޕެސިފިކޭޝަން އަދި ޑިޒައިންގެ މަސައްކަތްތަކެއް ހިމެނޭކަމަށެވެ.

މި އެއްބަސްވުމުގެ ދަށުން ގުޅީފަޅުގެ މަގުތައް ޒަމާނީ ފެންވަރަށް ތަރައްޤީކުރުމަށްވަނީ ހަމަޖެހިފައިވާއިރު، ޔުޓިލިޓީ ޚިދުމަތްތަކުގެ ތެރޭގައި ހިމެނޭ ކަރަންޓާއި ފެނާއި ނަރުދަމާގެ ޚިދުމަތް ޤާއިމުކުރުމުގެ މަސައްކަތް ވެސް އެ ކުންފުނިން ކުރުމަށް ވަނީ ހަމަޖެހިފައެވެ.