މިއަހަރުގެ އޮކްޓޯބަރުމަހުގެ ތެރޭގައި އެއާބަސް އޭ-330 ދެވަނަ ބޯޓު ރާއްޖެ ގެންނާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މޯލްޑިވިއަންގެ އުދުހުންތަކުގައި ބޭނުންކުރުމަށް ފުރަތަމަ ފަހަރަށް ގެނައި އެއާބަސް އޭ-330 މަރުކާގެ ބޯޓު ރާއްޖެ ގެނައުމަށް ބޭއްވި ހާއްސަ ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ، އައިލެންޑް އޭވިއޭޝަނަށް އެއާބަސް މަރުކާގެ ވައިޑްބޮޑީ ދެ މަތިންދާބޯޓު ގެނައުމަކީ އެމަނިކުފާނުގެ ރިޔާސީ ވައުދެއްކަމަށެވެ. އެ ވައުދުގެ ތެރެއިން ފުރަތަމަ ބޯޓު މިއަދު ރާއްޖެ ގެނެވިގެންދާއިރު، ދެވަނަ ބޯޓު އަންނަ އޮކްޓޯބަރުމަހުގެ ތެރޭގައި ރާއްޖެ ގެންނާނޭކަމަށް ރައީސ ްވިދާޅުވިއެވެ.

ރައީސް ޑރ.މުއިއްޒު ވިދާޅުވީ މި ބޯޓުތަކާއެކު ރާއްޖޭގެ ފަތުރުވެރިކަމުގެ ސިނާއަތް ފުޅާވެގެންދާނޭކަމަށެވެ. އަދި މިއީ ރާއްޖޭގެ އިގްތިސާދު ފުޅާކުރުމަށް މި ސަރުކާރުން ފަށާފައިވާ މަސައްކަތްތަކުގެ މުހިއްމު ފެށުމެއްކަމަށް ރައީސް ފާހަގަކުރެއްވިއެވެ. 

މޯލްޑިވިއަނުން މިއަދު ގެނައި  އެއާބަސް އޭ-330 މި ބޯޓު ޗައިނާގެ ތިން ސިޓީއަކަށް ދަތުރުތައް ކުރުމަށް ވަނީ ހަމަޖެހިފައެވެ.  އެއީ ބެއިޖިން، ޗެންދޫ އަދި ޝަންހާއީ އަށެވެ.