އައިލެންޑް އޭވިއޭޝަނަށް މާލީ ބޮޑެތި މައްސަލަތަކާ ކުރިމަތިވެ، ކުންފުނި ދަރަނިވެރިވީ އެންމެފަހުން ކުންފުނި ހިންގި މީހުނަށް މެނޭޖުކުރަން ނޭނގުމުންކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.

މޯލްޑިވިއަންގެ އުދުހުންތަކުގފައި ބޭނުންކުރުމަށް މިއަދު އެއާބަސް ވައިޑް ބޮޑީ ބޯޓު ގެނައުން ފާހަގަކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ޓްރާންސްޕޯޓް މިނިސްޓަރު އަދި އޭވިއޭޝަން ދާއިރާގައި 26 އަހަރަށްވުރެ ގިނަ ދުވަހު ހިދުމަތްކުރައްވާފައިވާ ކެޕްޓަން މުހައްމަދު އަމީން ވިދާޅުވީ، 2018 ވަނަ އަހަރު އައިލެންޑް އޭވިއޭޝަނަކީ 2.8 ބިލިއަން ރުފިޔާގެ ހަރުމުދާ ހުރި ކުންފުންޏެއް ކަމަށާއި، އެ އަހަރު ގާތްގަނޑަކަށް 2 ބިލިއަން ރުފިޔާގެ އާމްދަނީ ލިބިފައިވާކަމަށެވެ. އަމީން ވިދާޅުވީ 2018 ވަނަ އަހަރު ކުންފުނީގެ ނެޓް ޕްރޮފިޓް 80 މިލިއަނަށްވުރެ ގިނަ ރުފިޔާ ލިބިފައިވާއިރު، އެހާހިސާބަށް އާއިއރު ކުންފުންޏަކީ ދައުލަތަށް ޑިވިޑެންޑް ދައްކަމުން އައި ކުންފުންޏެއް ކަމަށެވެ.

މިނިސްޓަރު ވިދާޅުވީ 2023 ވަނަ އަހަަރު ނިމުނުއިރު އައިލެންޑް އޭވިއޭޝަން އޮތީ 2 ބިލިއަން ރުފިޔާއިން ދަރަނިވެރިވެފައި ކަމަށާއި،  ބައެއް މަންޒިލްތަކަށް ކުރަމުންއައި ދަތުރުތައްވެސް ހުއްޓުމަކަށް އައިސްފައިވާކަމަށެވެ. މީގެ އިތުރުން މޫދަށް ޖައްސާ ބޯޓުތަކުގެ ވަރަށްގިނަ ކޮންޓްރެކްޓްތައްވެސް ހުއްޓުމަކަށް އައިސްފައިވާކަމަށެވެ. މީގެ އިތުރުން 2013 ވަނަ އަހަރު މޯލްޑިވިއަނުން ޗައިނާއަށް ފެށިދަތުރުތައް ހުއްޓުމާއި، އެތައް މިލިއަން ރުފިޔާއެއް ހޭދަކޮށް އޭރު ކުންފުނީގައި އޮތް އެންމެރަނގަޅު އެއާބަސް 321 މަރުކާގެ ބޯޓުވެސް އޮތީ ދޫކޮށްލާފައި ކަމަށެވެ.

Advertisement

ރައީސް އިބްރާހިމް މުހައްމަދު ސޯލިހުގެ ވެރިކަމުގައި އައިލެންޑް އޭވިއޭޝަން ހިންގާފައިވަނީ ވަރަށް ދޯދިއާކޮށްކަން ފާހަގަކުރަމުން މިނިސްޓަރު އަމީން ވިދާޅުވީ، މިދިޔަ ސަރުކާރުން މިލިއަނުން މިލިއަނުން އުސޫލެއްނެތި ކުންފުނިން ދޫކޮށްފައިހުރި ކްރެޑިޓްތައް ކުންފުންޏަށް ހޯދޭތޯ މަސައްކަތްކުރަމުން އަންނަ ކަމަށެވެ. 

މިނިސްޓަރު ވިދާޅުވީ ރަނގަޅު މިސްރާބެއްގައި ހިންގަމުން އައި އައިލެންޑް އޭވިއޭޝަނަށް ދަރަނީގެ މައްސަލަތަކާ ކުރިމަތިލާން ޖެހުނީ މެނޭޖްކުރަން ނޭނގުމުންކަމަށެވެ. ކުންފުނީގެ ހަރުމުދާތައް ގެއްލި، ކުންފުނިން ކުރަމުން އައި ވިޔަފާރިތައް ގެއްލުމުގެ އަސްލަކީ މެނޭޖްކުރަން ނޭނގުންކަމަށް އަމީން ވިދާޅުވިއެވެ.