މިފަހުން މާލެއަށްކުރި ވިއްސާރާގައި ފެންބޮޑުވުމުގެ ސަބަބުން ގެތަކަށް ފެންވަދެ، ލިބުނު ގެއްލުންތައް ބެލުމަށް ކުރި މަސައްކަތުން މިހާތަނަށް 122 ގޭގެ އެސެސްމަންޓް ހަދައި ނިމިފައިވާކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ އޮފް މޯލްޑިވްސް އިން ބުނެފިއެވެ.

އެންޑީއެމްއޭއިން ބުނީ ޖެނުއަރީމަހުގެ 3 ވަނަ ދުވަހު މާލެއަށްކުރި ވިއްސާރާގައި ޑެމޭޖް އެސެސްމަންޓް ހަދަންޖެހޭ ކަމަށް ފާހަގަ ކުރެވުނު 141 ގޭގެ ތެރެއިން 112 ގޭގެ އެސެސްމަންޓް މިހާތަނަށް ވަނީ ހަދާ ނިމިފައި ވާކަމަށެވެ. މީގެ ތެރެއިން 13 ގެއަކުން އެސެސްމަންޓް ހަދަން ބޭނުން ނުވާ ކަމަށް އަންގާފައިވާކަމަށް އެންޑިއެމްއޭއިން ބުންޏެވެ. އަދި އެކި ސަބަބުތަކާހެދި 16 ގެއެއްގެ އެސެސްމަންޓް ހަދައި ނުނިމެއެވެ.

އެސަސްމަންޓް ހެދުމުގައި ޑިޒާސްޓާ އޮފީހުގެ އިތުރުން މިނިސްޓްރީ އޮފް ސޯޝަލް އެންޑް ފެމެލީ ޑިވިލޮޕްމެންޓް އަދި ދިވެހި ރެޑްކްރެސެންޓުން ބައިވެރިވިއެވެ. އެގެތަކަށް ލިބުނު ގެއްލުންތަކުގެ ތެރޭގައި އެންމެބޮޑަށް ފާހަގަކުރެވުނީ ގޭގައި ހިފާގެންގުޅޭ ތަކެއްޗަށް ލިބުނު ގެއްލުންތައްކަމަށް ޑިޒާސްޓާ އޮފީހުން ބުނެއެވެ.

މާލެއަށް ކުރި ވިއްސާރައާގުޅިގެން 226 މީހުންނަށް ވަނީ ވަގުތީ ބޯހިޔާވަހިކަން ފޯރުކޮށްދީފައެވެ. ވިއްސާރައިގެ ސަބަބުން ފެންބޮޑުވެގެން އެކި އެކި އެހީތަކަށް އެދި 774 އަށްވުރެ ގިނަ ތަްތަނުން ރިޕޯޓްކޮށްފައިވާއިރު، މީގެ ތެރެއިން 554 ތަންތަނުން ވެލިބަސްތާ ޖެހުމަށް ވަނީ އެދިފައެވެ. މީގެ އިތުރުން އާއްމު ދިރިއުޅުމަށް ހުރަސްއެޅޭ ހާލަތަށްދިޔަ 36 ގޭބީސީގެ 226 މީހުންނަށް ވަގުތީ ބޯހިޔާވަހިކަމާއި ކެއިން ބުއިން ފޯރުކޮށްދީފައިވާކަމަށްވެސް ޑިޒާސްޓާ އޮފީހުން ވަނީ ބުނެފައެވެ.