ގ.އުފުރިޔާގޭގައި ރޭގައި ހިނގި އަލިފާނުގެ ހާދިސާއާއި ގުޅިގެން އެކަކަށް ވަގުތީ ބޯހިޔާވަހިކަން ފޯރުކޮށްދީފިއެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އޮފް މޯލްޑިވްސް (އެންޑީއެމްއޭ) އިން ބުނީ، ގ.އުފުރިޔާ ގޭގެ އެޕާޓްމަންޓެއްގައި ހިނގި އަލިފާނުގެ ހާދިސާއާއި ގުޅިގެން އެ އެޕާޓްމަންޓުގައި ދިރިއުޅުނު މީހުންގެ ތެރެއިން އެހީތެރިކަން ބޭނުންވި ފަރާތަކަށް 1 ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު އެ އޮތޯރިޓީން ހަމަޖައްސައިދީފައިވާކަމަށެވެ.

އެމްއެންޑީއެފުން ބުނީ، ގ.އުފުރިޔާގޭގެ ހަވަނަ ފަންގިފިލާގައި އަލިފާން ރޯވެގެން އުޅޭ ކަމުގެ މައުލޫމާތު ލިބިފައިވަނީ ރޭ 23:23 ހާއިރުކަމަށެވެ.

އެއާއިއެކު، ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައިވާއިރު،  އަލިފާންގަނޑު އެއްކޮށް ނިއްވާލާފައިވަނީ 00:10 ހާއިރުކަމަށް އެމްއެންޑީއެފުން ބުނެއެވެ.

މި ހާދިސާގައި އަލިފާން ރޯވި އެޕާޓްމެންޓްގެ އެއް ކޮޓަރި ބޭނުން ނުކުރެވޭވަރަށް އަނދާފައިވާކަމަށާއި، އިމާރާތުގެ ހުރިހާ ފުލޯއަކުން މީހުން ހުސްކޮށް ވަނީ އިވެކުއޭޓް ކޮށްފައިވާއިރު، އަލިފާން ރޯވެފައި ވަނީ ހަވަނަ ފަންގިފިލާގެ އެޕާޓްމެންޓް ބީގައި ނަމަވެސް އަލިފާން އިތުރު އެހެން ދިމާލަކަށް ފެތުރިފައެއް ނުވާކަމަށް އެމްއެންޑީއެފުން މައުލޫމާތުދެއެވެ.

އެމްއެންޑީއެފުން އިތުރަށް ބުނީ، މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވި ނަމަވެސް ދުމުގެ އަސަރުކޮށްގެން އުމުރުން ދުވަސްވީ މީހަކު ހޮސްޕިޓަލަށް ގެންގޮސްފައިވާކަމަށެވެ.