ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ގދ. ހޯނޑެއްދޫގެ ފެނާއި ނަރުދަމާގެ ޚިދުމަތް އިފްތިތާހްކޮށްދެއްވައިފިއެވެ.

ރައީސް ޑރ.މުޢިއްޒު މި ޚިދުމަތް އިފްތިތާހްކޮށްދެއްވާފައިވަނީ އެމަނިކުފާނު މިހާރު ހުވަދުއަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ހޯނޑެއްދޫއަށް ވަޑައިގަތުމަށްފަހުއެވެ.

މިއީ 2022 ވަނަ އަހަރުގެ ޖޫން މަހުގެ 13 ވަނަ ދުވަހު އެގްޒިމް ބޭންކް އޮފް އިންޑިއާގެ ލައިން އޮފް ކްރެޑިޓްގެ ދަށުން އިންޑިއާގެ ކުންފުންޏެއްކަމަށްވާ ޓްރެވެނީ އިންޖިނިއަރިންގ އެންޑް އިންޑަސްޓްރީސް ލިމިޓެޑާއި ހަވާލުކޮށްގެން ހިންގާފައިވާ މަޝްރޫއެކެވެ.

Advertisement

މި މަސައްކަތަށް 4.9 މިލިއަނަށްވުރެ ގިނަ އެމެރިކާ ޑޮލަރު ޚަރަދުކޮށްފައިވާއިރު، ހޯނޑެއްދޫގެ ފެނާއި ނަރުދަމާ ނިޒާމުގެ މަޝްރޫއުގެ ދަށުން ނަރުދަމާގެ 5 ޕަމްޕް ސްޓޭޝަން ޤާއިމުކުރުމާއި، ސީ އައުޓް ފޯލް އެޅުމާއި، މުޅި ރަށުގައި ފެނާއި ނަރުދަމާ ނިޒާމުގެ ވިޔުގަ އެޅުން ހިމެނެއެވެ.

މިއާއިއެކު، މި މަޝްރޫއުގެ ދަށުން ދުވާލަކު 75 ޓަނުގެ ފެން އުފެއްދޭ ވަރުގެ 2 އާރުއޯ ޕްލާންޓް ބެހެއްޓުމާއި، ފެން ރައްކާ ކުރުމަށް 2 ޓޭންކް ބެހެއްޓުމުގެ އިތުރުން ގޭގެއަށް ފެނާއި ނަރުދަމާގެ ކަނެކްޝަން ގުޅައިދިނުން ހިމެނެއެވެ.