ދިވެހި ހާރިޖިއްޔާގެ 2022 ވަނަ އަހަރުގެ މާލީ މުއާމަލާތްތައް ކޮށްފައިވަނީ، މަސްއޫލިއްޔަތު އަދާކުރުމުގައި ތެދުވެރިކަމާއި އަމާނާތްތެރި ކަމާއެކުގައި ކަމަށް އޮޑިޓަރ ޖެނެރަލް ވިދާޅުވެއްޖެއެވެ.

އޮޑިޓަރ ޖެނެރަލް ހުސައިން ނިޔާޒީ ސޮއިކުރައްވައި ނެރުއްވި 2022 ވަނަ އަހަރުގެ ދިވެހި ހާރިޖިއްޔާގެ މާލީ އޮޑިޓް ރިޕޯޓްގައި ވިދާޅުވެފައިވަނީ، އެއަހަރު ހާރިޖިއްޔާއަށް ލިބުނު ފައިސާ އާއި އެ ފައިސާއިން ކުރެވުނު ހަރަދުތައް ހުރީ އެކަންކުރަން އޮންނަ އެންމެ ފުރިހަމައަށް ކޮށްފައި ކަމަށެވެ. މިގޮތުން މާލީ އަހަރުގެ ނިޔަލަށް ބާކީ ހުރި ފައިސާ އަދި އެއަހަރަށް ފާސްކުރެވުނު ބަޖެޓާއި އެ ބަޖެޓުން ހޭދަކުރެވުނުގޮތް ތެދުވެރުކަމާއި އަމާނާތްތެރިކަމާއެކު ހަޤީޤަތާ އެއްގޮތަށް އަންގައިދީފައިވާކަމަށް އޮޑިޓަރ ޖެނެރަލްގެ ރިޕޯޓްގައި ވަނީ ވިދާޅުވެފައެވެ.

އެހެންކަމުން ދިވެހި ހާރިޖިއްޔާއިން 2022 ވަނަ އަހަރު ހަރަދުބަރަދުތައް ކޮށްފައިހުރީ، އިންޓަރނޭޝަނަލް ޕަބްލިކް ސެކްޓަރ އެކައުންޓިންގ ސްޓޭންޑަށް (އިޕްސަސް) އާއެއްގޮތަށް ތައްޔާރުކޮށްފައި ކަމަށްވެސް އޮޑިޓަރ ޖެނެރަލް ފާހަގަކުރެއްވިއެވެ. 

ފޮރިން މިނިސްޓްރީގެ 2022 ވަނަ އަހަރުގެ މާލީ މުއާމަލާތްތަކުގައި އެއްވެސް މައްސަލައެއް ނެތްކަމަށް އޮޑިޓަރ ޖެނެރަލް ވިދާޅުވިއިރު، ސަރުކާރުގެ އެހެން އިދާރާތަކާ ހިލާފަށް ހާރިޖިއްޔާގެ އޮޑިތަރ ޖެނެރަލް އެންމެފަހުން ކުރެއްވި އޮޑިޓްތަކުގައިވެސް ވަނީ އެ ވުޒާރާގެ މުއާމަލާތްތައް ރަނގަޅުކަމަށް ބުނެފައެވެ.

އޮޑިޓަރ ޖެނެރަލްގެ މި ރިޕޯޓާ ގުޅޭގޮތުން ޢަބްދުﷲ ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، އެއީ ދިވެހި ހާރިޖިއްޔާގެ މުއައްޒަފުންގެ ބުރަމަސައްކަތާއި ޕްރޮފެޝަނަލިޒަމް ކަމަށާއި، ހާރިޖިއްޔާގެ މުއައްޒަފުންނަށް ޝުކުރު އަދާކުރާކަމަށެވެ.

ދިވެހި ހާރިޖިއްޔާގެ މިނިސްޓަރުކަމުގެ މަގާމުގައި 2022 ވަނަ އަހަރު ހުންނެވީ، ޢަބްދުﷲ ޝާހިދެވެ.