ކަސްޓަމްސް ހިޔާނާތުގެ މައްސަލާގައި ހިމެނޭކަމަށް ފުލުހުން ފާހަގަކުރާ އެއްވެސް އޮފިސަރަކު ރިޓަޔަރ ކޮށްފައިނުވާނޭކަމަށް މޯލްޑިވްސް ކަސްޓަމްސް ސާވިސް އިން ހާމަކޮށްފިއެވެ.

ކަސްޓަމްސްއިްނ ބުނީ، އެ އިދާރާގެ ބައެއް އޮފިސަރުންނަށް ތުހުމަތު ކުރެވިގެން މަނީ ލޯންޑްރިން، ހިޔާނާތް އަދި ރިޝްވަތާ ގުޅޭގޮތުން ފުލުހުންގެ ހިދުމަތުން ތަހުގީގެއް ކުރަމުންގެންދާކަން ކަސްޓަމްސްއަށް އަންގާފައިވާކަމަށެވެ. މިގޮތުން ތަހުގީގުގައި ހިމެނޭ އެއްވެސް އޮފިސަރަކު ކަސްޓަމްސްއިން ރިޓަޔަރކޮށްފައި ނުވާނޭކަމުގެ ޔަގީންކަން އެ އިދާރާއިން ވަނީ ދީފައެވެ.

މޯލްޑިވްސް ކަސްޓަމްސް ސާވިސްގެ އޮފިސަރުންތަކެއްގެ އެކައުންޓްތަކުގައި 400 މިލިއަނެއްހާ ރުފިޔާ ދައުރުކުރި މައްސަލައެއް ފެންމަތިވެ، ފުލުހުން ދަނީ އެ މައްސަލަ ބަލަމުންނެވެ. 

ވޮއިސްއަށް މައުލޫމާތު ލިބިފައިވާ ގޮތުގައި ހިޔާނާތުގެ މި މުއާމަލާތުގައި ކަސްޓަމްސްގެ އެކި ރޭންކުތަކަށް ނިސްބަތްވާ އޮފިސަރުން ހިމެނެއެވެ. މިކަމާ ގުޅޭގޮތުން ފުލުހުންގެ އިދާރާއިުން ބުނެފައިވަނީ، މޯލްޑިވްސް ކަސްޓަމްސް ސާވިސްގެ އޮފިސަރުންތަކަކަށް ތުހުމަތުކުރެވޭ މަނީ ލޯންޑަރިން، ހިޔާނާތް އަދި ރިޝްވަތުގެ މައްސަލައެއް ފުލުހުންގެ ސަމާލުކަމަށް އައިސްފައިވާކަމަށެވެ. އެގޮތުން މިއަހަރުގެ އޮގަސްޓްމަހުގެ 19 ވަނަ ދުވަހު އެ މައްސަލައިގެ ތަހުގީގު ފަށާފައިވާކަން ފުލުހުން ބުންޏެވެ.

ވޮއިސްއަށް  މައުލޫމާތު ލިބިފައިވާ ގޮތުގައި ހިޔާނާތުގެ މި މައްސަލާގައި ކަސްޓަމްސްގެ 20 ވަރަކަށް އޮފިސަރުން ޝާމިލްވެއެވެ.  ކަސްޓަމްސް ސާވިސްގެ ބައެއް މުއައްޒަފުންގެ ތެރޭގައި ކޮރަޕްޝަނާ ރިޝްވަތުގެ މައްސަލަތަށް އުޅޭވާހަކައަކީ އާއްމުންގެ ތެރޭގައިވެސް ދެކެވޭ ވާހަކައެކެވެ.