"ރޯލީމޭ"އަށް ބެލުންތެރިންގެ ފަރާތުން ބޮޑު ތަރުހީބެއް!

މީޑިއާނެޓް އެމްއެސްޓީވީގެ ވީޑިއޯ ކްލަބުން ދައްކަމުން އަންނަ އެންޓަޓެއިންމަންޓުން އުފެއްދި ވެބް ސީރީޒް "ރޯލީމޭ"އަށް ބެލުންތެރިންގެ ބޮޑު ތަރުހީބެއް ލިބިއްޖެއެވެ.

"ރޯލީމޭ" އަކީ ރާއްޖޭގެ އެންމެ ކާމިޔާބު އަދި މިހާރު އެންމެގިނަ ފިލްމު އުފެއްދުމުގެ ރެކޯޑް އޮންނަ ޕްރޮޑަކްޝަން ހައުސް ޑާކް ރެއިން އެންޓަޓެއިންމަންޓްއާ ގުޅިގެން މީޑިއާނެޓް އޮރިޖިނަލްސް ދަށުން، ގެނެސްދޭ ސީރީޒްއެކެވެ.

ރޯލީމޭގެ 4 ވަނަ އެޕިސޯޑް މިހާރު ދައްކަން ފަށާފައިވާއިރު، ސޯޝަލް މީޑިއާގައި މި ސީރީޒްއާ ގުޅޭގޮތުން ބެލުންތެރިން ފާޅުކޮށްފައިވާ ހިޔާލްތަކަށް ބަލާއިރު، ގިނަ މީހުންވަނީ ސީރީޒްގައި އެމީހުން ބޭނުންވިފަދަ ރަހަތަކެއް އެކުލެވިގެންވާކަމަށް ފާހަގަކޮށްފައެވެ. ޑާކްރެއިނުން މިހާތަނަށް ބެލުންތެރިންނާ ހަމަޔަށް ގެނެސްދިން ކޮންމެ އުފެއްދުމަކީވެސް ބެލުންތެރިން ބަލައިގަނެފައިވާ އުފެއްދުންތަކެކެވެ.

ރޯލީމޭއަށް ބެލުންތެރިންގެ ފަރާތުން ލިބުނު ތަރުހީބާއެކު އެ ސީރީޒް މިހާރު އުޅެނީ، މީޑިއާނެޓް އެމްސްޓީވީގެ ވީޑިއޯ ކުލަބުގެ ޓްރެންޑިންގެ އެންމެ ކުރީގައެވެ

ޑާކްރެއިނުން ގެނެސްދޭ މި ވެބްސީރީޒް ރޯލީމޭ އަކީ ޖުމްލަ 15 އެޕިސޯޑުގެ މައްޗަށް އެކުލެވިފައިވާ ސީރީޒްއެކެވެ. ރޯލީމޭގައި ފެނިގެންދަނީ ވަރަށް ގާތްކޮށް އުޅޭ ބަޔަކަށް އެމީހުންގެ ދިރިއުޅުމުގައި ދިމާވާ ޝައުގުވެރިކުރުވަނިވި ތަފާތު ހާދިސާތަކެވެ.

ރޯލީމޭގެ މެއިން ކާސްޓުންގެ ގޮތުގައި ފެނިގެންދަނީ، އިތުރު ތައާރަފަކަށް ބޭނުންނުވާ ޝަރަފު އަބްދުﷲ، މަރިޔަމް މަޖުދާ (މަޖޫ) އެވެ. މި ފިލްމުގައި ޝަރަފް ފެނިގެންދަނީ ޑާކްރެއިނުން މިހާތަނަށް ގެނެސްދިން ފިލްމުތަކުގައި ފެނިގެންދާގޮތާ ތަފާތު ކެރެކްޓާއެއްގެ ގޮތުގައެވެ. ރޯލީމޭ ސީރީޒްގައި ދެން ފެނިގެންދާ، މޫސާ އަލީފް، ނުޒުހަތު ޝުއައިބް (ނުޒޫ) ގެ ރޯލްވެސް ވަކި ކުޑައެއް ނޫނެވެ. ސީރީޒްގައި ދެން ފެނިގެންދަނީ، ރޯނު ހަސަން މަނިކު، އައިމިނަތު ޝުހާ، އަދި ޝީލާ ނަޖީބެވެ.

ރޯލީމޭއަކީ ޝަހުދާ މަހުމޫދު ލިޔެ ތައްޔާރުކޮށްފައިވާ ސްކްރީންޕްލޭއަކަށް އަލީ ޝިފާއު (ޗިއްޕެ) ޑައިރެކްޓްކުރާ ސީރީޒްއެކެވެ. ޝަހުދާއަކީ ޑާކްރެއިނުން އެންމެފަހުން ސިނަމާއަށް ނެރުނު "ބިބީ" ގެ ލިޔެ ޑައިރެކްޓްކުރި ފަރާތެވެ.