ފަތުރުވެރިކަމާ ބެހޭ ވަޒީރު ކަމުގެ މަގާމުގައި ހުންނަވައިގެން ދަރިކަލުން އިބްރާހީމް ފައިޞަލް ޚިދުމަތްކުރެއްވީ އިޚްލާޞްތެރިކަމާއި ތެދުވެރިކަމާއެކު ކަމަށާއި، ނަތީޖާ ނެރެދެއްކެވި ކަމަށް، ރައްޔިތުންގެ މަޖިލީހުގެ ރައީސް އަބްދުއްރަޙީމް އަބްދުالله ވިދާޅުވެއްޖެއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވަނީ، ފައިޞަލް މިނިސްޓަރ އޮފް ޓޫރިޒަމްގެ މަޤާމުން ވަކިކުރައްވާފައެވެ. 

އަދި މިނިސްޓްރީ އޮފް ޓޫރިޒަމް ވަގުތީގޮތުން ހިންގެވުން މިއަދުން ފެށިގެން މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދާ ވަނީ ހަވާލުކުރައްވާފައެވެ.

ނަމަވެސް، ފައިޞަލް މަޤާމުން ވަކިކުރެއްވި ސަބަބެއް ރައީސް އޮފީހުން ހާމަކޮށްފައެއް ނުވެއެވެ.

މިކަމާ ގުޅިގެން އަބްދުއްރަޙީމް އެކްސްގައި ކުރެއްވި ޕޯސްޓެއްގައި ވިދާޅުވީ، ފައިޞަލްގެ ޚިދުމަތާ ގުޅިގެން އެމަނިކުފާނާއި އެމަނިކުފާނުގެ އާއިލާ ފަޚުރުވެރިވާ ކަމަށެވެ. އަދި ފަތުރުވެރިކަމުގެ ދާއިރާގެ އިތުބާރާއި ލޯބި ފައިޞަލް ހޯއްދެވި ކަމަށްވެސް ވިދާޅުވިއެވެ.

"އަޅުގަނޑުގެ ދަރިފުޅު އިބްރާހީމް ފައިޞަލަށްޓަކައި އަޅުގަނޑާއި އަޅުގަނޑުގެ ޢާއިލާ ފަޚުރުވެރިވަން. ރާއްޖޭގެ ފަތުރުވެރިކަމާބެހޭ ވަޒީރުކަމުގެ މަގާމުގައި ހުރެގެން ޚިދުމަތް ކުރީ އިޚްލާޞްތެރިކަމާއި ތެދުވެރިކަމާއެކު. ނަތީޖާ ނެރެދެއްކި. ދާއިރާގެ އިތުބާރާއި ލޯބި ހޯދި،" އަބްދުއްރަޙީމް ވިދާޅުވިއެވެ.

މިއާއެކު އަބްދުއްރަޙީމް ވަނީ ފައިޞަލަށް ސާބިތުކަމާއި ކެތްތެރިކަން މިންވަރުކުރައްވައި މާ އުޖާލާ މާދަމާއެއް ދެއްކެވުންއެދި ދުޢާކުރައްވާފައެވެ.