Beyhuge mahssala ah varah avahah edhevey halleh libeyne: Nazim

ބޭހުގެ މައްސަލައަށް ވަރަށް އަވަހަށް އެދެވޭ ހައްލެއް ލިބޭނެ: ނާޒިމް

13 Feb 2025 | 11:05

ހެލްތު މިނިސްޓަރ ނާޒިމް: ފޮޓޯ/ ރައީސް އޮފީސް

ބޭހުގެ މައްސަލައަށް ވަރަށް އަވަހަށް އެދެވޭ ހައްލެއް ލިބޭނެ ކަމަށް ހެލްތު މިނިސްޓަރު އަބްދުالله ނާޒިމް އިބްރާޙީމް ވިދާޅުވެއްޖެ އެވެ.

އެމްއެމްޓީވީގެ ޕްރޮގްރާމެއްގައި މިނިސްޓަރު ނާޒިމް ރޭ ވިދާޅުވީ ސިއްޙީ ނިޒާމުގެ ތެރެއިން ނާޖައިޒް ފައިދާ ނެގުން މަދުކުރުމަށް ރައީސް ޑރ މުޙައްމަދު މުޢިއްޒު އެޅުއްވި އެންމެ މުހިންމު އެއް ފިޔަވަޅަކީ ބޭހުގެ އަގު ކޮންޓްރޯލް ކުރުން ކަމަށެވެ.

ރައީސް މުޢިއްޒު ވެރިކަމާ ހަވާލުވެވަޑައިގެންނެވިއިރު އާސަންދަ ނިޒާމް އޮތީ ބިލިއަނުން ދަރާފަ. އެގޮތުގައި ތިބީމަ، ހަލާކުވަނީ ސިއްހީ ނިޒާމު އެކަންޏެއް ނޫން. މުޅި ގައުމުގެ އިގްތިޞާދު ފުނޑިގެން ދަނީ. ބޭރު ހޮސްޕިޓަލް ތަކަށް މި ގައުމުދަރާ، ގައުމުގެ އިގްތިޞާދަށް ނުކަތާވަރަށް އެ ފައިސާ ނަހަމަ ގޮތުގައި ހަރަދުކުރެވިގެންދާ މަންޒަރު އަޅުގަނޑުމެންނަށް މި ފެންނަނީ

މިނިސްޓަރު އަބްދުالله ނާޒިމް އިބްރާޙީމް

މިއާއެކު ނާޒިމް ވިދާޅުވީ އާސަންދައަށް ކުރެވޭ ޚަރަދުގެ 60 އިންސައްތަ އަކީ ބޭހަށް ކުރެވޭ ޚަރަދު ކަމަށެވެ. އަދި ބޭސް ލިބޭ ނިޒާމު ރާއްޖޭގައި ހުރީ އެންމެ ރަނގަޅަށް ނޫން ކަމަށްވާއިރު ބޭހުގެ އަގުވެސް ހުރީ ރަނގަޅަށް ނޫން ކަމަށް ވަޒީރު ވިދާޅުވިއެވެ. އެހެންކަމުން މި ސަރުކާރުން ބޭހުގެ އަގު ކޮންޓްރޯލް ކުރި ކަމަށާ، އެއާއެކު ބޭސް ލިބުމުގެ ދަތިތަކާ ކުރިމަތިލާން ޖެހުނުކަން ވަޒީރު ފާހަގަކުރެއްވިއެވެ.

އެކަންތައްތައް ހައްލު ކުރުމަށް ކަމާގުޅޭ ހުރިހާ ފަރާތްތަކުން މަޝްވަރާކޮށް، ގޮންޖެހުންތަކުން އަރައިގަތުމުގެ މަސައްކަތް އެބަކުރަން. އިރާދަކުރެއްވިއްޔާ ނަތީޖާއަކަށް ވެގެންދާނީ، މިއަދު މިއޮތް ކުދި ކުދި އުނދަގޫ ތަކަށް ދާއިމީ ހައްލެއް އައުން. އިރާދަކުރެއްވިއްޔާ ބޭހުގެ މައްސަލައަށް އެދެވޭ ހައްލެއް އަވަހަށް ލިބިގެންދާނެ

މިނިސްޓަރު އަބްދުالله ނާޒިމް އިބްރާޙީމް

މީގެ އިތުރުން، ބޭހުގެ ނިޒާމު ގަނޑުބަނޑުކުރަން އަބަދުވެސް ބަޔަކު އުޅޭ ކަމަށާއި އެ ގޮތުން ސިޔާސީ ބޭނުމަށް މިފަދަ ކަންކަން ނުބައިކޮށް ފަތުރާ ބަޔަކު އުޅޭ ކަމަށްވެސް ނާޒިމް ވިދާޅުވި އެވެ.

ހަބަރު

ޢަބްދުالله ނާޒިމް