މެލޭޝިއާގެ ބޮޑުވަޒީރު އަންވަރް އިބްރާހީމްގެ ދަޢުވަތަކަށް ރައީސް ޑރ. މުޙައްމަދު މުއިއްޒު މެލޭޝިއާއަށް ކުރެއްވި ފުރަތަމަ ރަސްމީ ދަތުރުފުޅު ނިންމަވާލައްވައިފިއެވެ.

މި ދަތުރުފުޅުގައި ދިވެހި ސަރުކާރާއި މެލޭޝިއާ ސަރުކާރާ ދެމެދު މުހިންމު މަޝްވަރާ ތަކެއް ވަނީ ކުރިއަށް ގެންދެވިފައެވެ. އަދި ދެ ޤައުމުގެ ދެމެދުގައި އެކިއެކި ދާއިރާތަކުން އެއްބާރުލުން ދިނުމާއި ގުޅޭގޮތުން އެއްބަސްވުންތަކުގައި ސޮއިކުރެވުނެވެ.

މީގެ އިތުރުން، ދެ ޤައުމުގެ ގުޅުން ބަދަހިކުރުމަށް ދެގައުމުގެ ވެރިން އިޤްރާރުވެ ވަޑައިގަތްކަން ޖޮއިންޓް ޕްރެސް ކޮންފަރެންސްއެއްގައި އިޢުލާނު ކުރެއްވިއެވެ.

Advertisement

ހަމައެހެންމެ، ރައީސް މުއިއްޒު ވަނީ މެލޭޝިއާގެ އިންވެސްޓަރުންނަށް ދިވެހިރާއްޖޭގައި ހުރި އިންވެސްޓްމަންޓް ފުރުޞަތުތަކުގެ މަޢުލޫމާތު ދެއްވާފައެވެ. މިކަން ކުރެއްވީ މެލޭޝިއާގެ ބޮޑުވަޒީރުވެސް ބައިވެރިވެ ވަޑައިގެންނެވި "މޯލްޑިވްސް-މެލޭޝިއާ ބިޒްނަސް ފޯރަމް 2025" ގައެވެ.

މީގެ އިތުރުން، މެލޭޝިއާއަށް ކުރެއްވި މި ދަތުރުފުޅުގައި ރައީސުލްޖުމްހޫރިއްޔާ ވަނީ އެ ޤައުމުގައި ދިރިއުޅޭ ދިވެހިންނާ ބައްދަލުކުރައްވައި، އެމީހުންގެ ޙާލު ބައްލަވާފައެވެ. މި ބައްދަލުކުރެއްވުމުގައި އެ މަނިކުފާނު ވަނީ ދިވެހި ދަރިވަރުންނަށް ކަންކަން ފަސޭހަކޮށްދިނުމުގެ ގޮތުން، އަންނަ އަހަރުން ފެށިގެން ކޮންމެ އަހަރަކުވެސް ދައުލަތުގެ ބަޖެޓުން މެލޭޝިއާގައި ކިޔަވާ ދަރިވަރުންގެ "މޯލްޑިވިއަން ސްޓޫޑަންޓްސް އެސޯސިއޭޝަން" އަށް 3،000 އެމެރިކާ ޑޮލަރަށްވާ މެލޭޝިއާ ރިންގިޓް ޖަމާކުރެއްވުމަށް ނިންމަވާފައިވާކަން އިޢުލާންކުރައްވާފައެވެ.

އެ ހަފުލާގައި، ރައީސުލްޖުމްހޫރިއްޔާ ދިވެހި އައި.ޑީ ކާޑުގެ ޚިދުމަތާއި، ދިވެހި އިލެކްޓްރޯނިކް ޕާސްޕޯޓްގެ ޚިދުމަތް މެލޭޝިއާގައި ރަސްމީކޮށް ފައްޓަވައިދެއްވައި އަދި "މޯލްޑިވިއަން ސްޓޫޑަންޓްސް އެސޯސިއޭޝަން" އިފްތިތާޙްކޮށްދެއްވިއެވެ.

މި ދަތުރުފުޅުގައި، އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިއާ (އައި.އައި.ޔޫ.އެމް) އިން ރައީސް މުއިއްޒަށް އިސްލާމީ ލީޑަރޝިޕް އަދި މަދަނީ ތަރައްޤީގެ ދާއިރާއިން ޑޮކްޓަރޭޓް އޮފް އޮނަރަރީ ޑިގްރީގެ ޝަރަފު ވަނީ އަރުއްވާފައެވެ.

ރައީސް މުއިއްޒު މެލޭޝިއާގައި ހުންނަ ދިވެހިރާއްޖޭގެ ހައި ކޮމިޝަނަށްވެސް ޒިޔާރަތްކުރައްވައި، އެތަނުގެ މުވައްޒަފުންގެ މަސައްކަތަށް ތަޢުރީފުކުރައްވައި، ބޭރުގައި ދިރިއުޅޭ ދިވެހިންނަށް އެހީތެރިވުމަށް އިރުޝާދު ދެއްވާފައިވެއެވެ.