ސަރުކާރުގެ ސިޔާސަތްތަކާ ދެކޮޅަށް އަޑުއުފުލުމަށް ނިކުމެ މިއުޅެނީ، ރާއްޖޭގެ ރައީސުލްޖުމްހޫރިއްޔާކަމުގެ މަގާމު ނުލިބިގެން ނޫންކަމަށް ކުރީގެ ރައީސް ޢަބްދުﷲ ޔާމިން ވިދާޅުވެއްޖެއެވެ.

ހުޅުމާލޭ ދެވަނަ ފިޔަވަހީގައި ރޭ ބޭއްވި ބާބެކިއުއެއްގައި ބައިވެރިވެ ވަޑައިގެން ވާހަކަދައްކަވަމުން ރައީސް ޔާމީން ވިދާޅުވީ، ރާއްޖެ ހަލާކުވަމުންދާ މަންޒަރު ބަހަލައްޓައިގެން ހުންނަން ބޭނުންނުވާ ކަމަށާއި، މިހާރު ފެނިގެންމިދަނީ ސަރުކާރުގެ ނާގާބިލްކަމުން ރައްޔިތުން އެތައް ތަކްލީފްތަކެއް އުފުލަންޖެހޭ މަންޒަރުކަމަށެވެ.

ޔާމީން ވިދާޅުވީ، ކުރިމަތިވި ކަންކަމުގައި ސަރުކާރުން އެޅި ފިޔަވަޅުތަކެއްގެ ނަތީޖާއެއްގެ ގޮތުން ޑޮލަރެއްގެ އަގު މިއަދު 20 ރުފިޔާއަށް އަރައިގެންދިޔައިރު، މިއަދު ޑޮލަރު ގަންނަންވެސް ނުލިބޭކަމަށެވެ. މުދާ އަގުބޮޑުވެ، ރައްޔިތުންނަށް އެކަމުގެ ނޭދެވޭ އަސަރުތައް ކުރަމުންދިޔަނަމަވެސް މިހާރު އަޑުއިވެނީ ސަރުކާރުގައި އިސްކޮށްތިބި މީހުންނާއި ކުންފުނިތަކުގެ ވެރިން ހުޅުމާލެއިން ފްލެޓްތައް ގަންނަމުންދާ ވާހަކަތައްކަމަށެވެ.

މިގައުމުގެ އެއްވަނަ ދަރަޖައިގެ ރައްޔިތުންގެ ގޮތުގައި އުޅެންޖެހޭނީ ވެރިކަންކުރާމީހުން އެކަނި ނޫންކަން ފާހަގަކުރައްވަމުން ރައީސް ޔާމީން ވިދާޅުވީ އެންމެ ނިކަމެތިމީހާވެސް އެމީހާގެ މުހުތާދުތައް ދެނެގަނެ އެކަންކަން ފުއްދައިދޭން ޖެހޭނޭކަމަށެވެ. ނަމަވެސް މިއަދު ފެނިގެން މިދަނީ އެންމެ އަސާސީ ބޭނުންތައްވެސް ފުދިގެން ނުދާމަންޒަރުކަމަށާއި، ބަލިވެގެން އެންމެ ބޭނުންވާ ވަގުތު އާސަންދައިގެ ދަށުން މިހާރު ބޭސްގުޅައެއްވެސް ނުލިބޭ ކަމަށެވެ.

ދުވަހެއް ދުވަހަށް ސިޔާސީ ކަންކަމަށް ކުރަމުންގެންދާ ހޭދަތަކާއި ކޮރަޕްޝަނުގެ ފައިސާ އިތުރުވަމުންދާކަން ފާހަގަކުރައްވަމުން ރައީސް ޔާމިން ވިދާޅުވީ އެފަދަ މައްސަލަތައް ބަލާނޭ މިނިވަން މުއައްސަސާއެއް މިއަދު ރާއްޖޭގައި ނެތްކަމަށެވެ. ރައީސް ޔާމިން ވިދާޅުވީ މި ދައްކަނީ ސަރުކާރާ ދެކޮޅަށް ނިކުމެ ވެރިކަމާ ދެކޮޅަށް ކަންކަން ކުރާ ވާހަކަ ނޫންކަމަށާއި، މި ދައްކަނީ ސަރުކާރުގެ ތެރޭގައި ހިނގާ އުސޫލާ ހިލާފްކަންކަން ހުއްޓުވުމުގެ ވާހަކަތައް ކަމަށެވެ.

ރޭގެ ޖަލްސާގައި ރައީސް ޔާމިނުވަނީ ގެއްލުނު ކަނޑުގެ ސަރަހައްދު ހޯދުމުގައި ސަރުކާރުން މަސައްކަތްކުރަމުން ނުދާކަން ފާހަގަކޮށް ރައީސް ޑރ.މުއިއްޒުއަށްވެސް ފާޑުވިދާޅުވެ ވާހަކަދައްކަވާފައެވެ.