އައިލެންޑް އޭވިއޭޝަނަށް ވިޔަފާރިން ލިބެންހުރި އަދަދަށްވުރެ ދައްކަންޖެހޭ ދަރަނި ބޮޑުކަމަށް އެކުންފުނީގެ މާލީހިސާބުތަކުން ދައްކައިފިއެވެ.

އޮޑިޓަރ ޖެނެރަލްގެ އޮފީހުންވަނީ ނިމިގެންދިޔަ 2024 ވަނަ އަހަރު އައިލެންޑް އޭވިއޭޝަންގެ މާލީ ހިސާބުތައް ހާމަކޮށްފައެވެ. އައިލެންޑް އޭވިއޭޝަނުގެ މިދިޔަ އަހަރުގެ މާލީހިސާބުތަކަށް ބަލާއިރު، އެއަހަރު އެކުންފުންޏަށް ވަނީ 2.8 މިލިއަން ރުފިޔާގެ ގެއްލުމެއް ލިބިފައެވެ. މިއީ އައިލެންޑް އޭވިއޭޝަނަށް ވިދިވިދިގެން ގެއްލުންވި 5 ވަނަ އަހަރެވެ. އައިލެންޑް އޭވިއޭޝަނަށް 2019 ވަނަ އަހަރު 93 މިލިއަން ރުފިޔާގެ ފައިދާއެއް ލިބުނު ނަމަވެސް އޭގެފަހުން އެކުންފުންޏަށް ފައިދާއެއް ނުވެއެވެ.

އޮޑިޓަރ ޖެނެރަލް ނެރުއްވާފައިވާ އައިލެންޑް އޭވިއޭޝަނުގެ މާލީހިސާބުތަކަށް ބަލާއިރު، ކުރެވުނު ވިޔަފާރިން ލިބެންހުރި އަދަދުތަކަށްވުރެ އެހެން ފަރާތްތަކަށް ދޭންޖެހޭ ފައިސާގެ އަދަދު އިތުރެވެ. މިދިޔަ އަހަރު ނިމުނުއިރު އައިލެންޑް އޭވިއޭޝަނަށް ލިބެންޖެހޭ ފައިސާގެ އަދަދަކީ، 758.8 މިލިއަން ރުފިޔާއެވެ. އަދި އެކުންފުނިން އެހެން ފަރާތްތަކަށް ދައްކަންޖެހޭ އަދަދު 1 ބިލިއަން ރުފިޔާއަށްވުރެ ގިނަ އެވެ. މީގެ އިތުރުން މިހާރުވެސް އެހެންފަރާތްތަކަށް ދައްކަންޖެހި ނުދައްކާ އިތް އަދަދު 1.3 ބިލިއަން ރުފިޔާއަށް އަރައެވެ.

އައިލެންޑް އޭވިއޭޝަނަށް އެންމެގިނައިން ފައިސާ ދައްކަންޖެހެނީ އާސަންދަ ކުންފުންޏެވެ. އާސަންދަ ކުންފުނިން ދަތުރުތައްކޮށް އައިލެންޑް އޭވިއޭޝަނަށް 149 މިލިއަނަށްވުރެ ގިނަ ރުފިޔާ އޮތްއިރު، ރައީސްަ އޮފީހާއި، ފުލުހުންނާއި، އެމްއެންޑީއެފުންވެސް އެކުންފުންޏަށް ދައްކަންޖެހޭ ފައިސާ މިލިއަން ރުފިޔާއިން ގުނާލެވެއވެެ.

އައިލެންޑް އޭވިއޭޝަނުން އެންމެ ގިނައިން ފައިސާ ދައްކަންޖެހެނީ އެއާޕޯޓްތައް ހިންގާ ކުންފުނިތަކަށެވެ. މީގެ ތެރޭގައި މުޅިންވެސް ހިމެނެނީ ރައްޖޭގެ އެއާޕޯޓްތައް ހިންގާ ކުންފުނިތަކެވެ. އައިލެންޑް އޭވިއޭޝަނުން އެންމެގިނައިން ފައިސާ ދައްކަންޖެހެނީ  އެމްއޭސީއެލްއަށެވެ. އެކުންފުންޏަށް ދައްކަންޖެހޭ ފައިސާގެ އަދަދު 1.1 ބިލިއަން ރުފިޔާއަށް އަރާއިރު، ރީޖަނަލްއެއާޕޯޓް ކުންފުންޏަށް 115 މިލިއަނަށްވުރެ ގިނަ ރުފިޔާ ދައްކަންޖެހެއެވެ.