މޫސުން ގޯސްވެ ކުޅުދުއްފުއްޓަށް ދިޔަ ފްލައިޓެއް އެނބުރި މާލެއަށް
މޫސުން ގޯސްވުމުގެ ސަބަބުން ހދ. ކުޅުދުއްފުއްޓަށް މިއަދު ހެނދުނު ދިޔަ މޯލްޑިވިއަންގެ މަތިންދާ ބޯޓެއް ނުޖެއްސި ގިނައިރުވުމުގެ ސަބަބުން އަނބުރާ މާލެ އަތުވެއްޖެއެވެ.
މޯލްޑިވިއަންގެ އެ ބޯޓު ކުޅުދުއްފުއްޓަށް ޖެއްސުމަށް ހަމަޖެހިފައި އޮތީ މިއަދުގެ ހެނދުނު 9:40 ގައެވެ.
މަތިންދާ ބޯޓު ކުޅުދުއްފުށީ ރަންވޭގައި ޖެއްސޭތޯ ގަޑިއިރެއްހާއިރު ކުރި މަސައްކަތް ނާކާމިޔާބުވުމުގެ ސަބަބުން ބޯޓު ދެން އަނބުރާލީ ނ. މާފަރު އެއަރޕޯޓުގައި ޖެއްސުމަށެވެ. އެހެންނަމަވެސް މާފަރު އެއަރޕޯޓްގައި ބޯޓް ޖެއްސުމަށް ކުރި މަސައްކަތްވެސް ނާކާމިޔާބުވެ ފްލައިޓް އެނބުރި އައީ މާލެއަށެވެ.
އެ ބޯޓު ވަނީ ވެލާނާ އިންޓަނޭޝަނަލް އެއާޕޯޓުގައި މިއަދު 11 ޖެހިއިރު ޖައްސާފައެވެ.
ފާހަގަކޮށްލަންޖެހޭ ގޮތުގައި ރާއްޖޭގެ އުތުރަުގެ ސަރަހައްދަށް މިވަގުތު މޫސުން ވަރަށް ގޯސްކަމަށް މޫސުމާ ބެހޭ ޤައުމީ އިދާރާއިން ވަނީ ބުނެފައެވެ.
ރާއްޖެއަށް މިހާރު ކުރަމުން މިދާ ވިއްސާރާގައި ވައިގަދަވެފައި ކަނޑުތައް ގަދަވާނެކަމަށް މެޓް އޮފީހުން ވަނީ މީގެ ކުރިން ބުނެފައެވެ.
Advertisement
This content is created and paid for by advertisers and does not involve Voice Journalists
