ރައީސުލްޖުމްހޫރިއްޔާ އދ އަތޮޅުގެ ރަށްތަކަށް ކުރައްވާ ދަތުރުފުޅެއްގައި ފުރާވަޑައިގަންނަވައިފި
ރައީސުލްޖުމްހޫރިއްޔާ ޑރ.މުހައްމަދު މުއިއްޒު އދ އަތޮޅުގެ ރަށްތަކަށް ކުރައްވާ ދަތުރުފުޅެއްގައި މިއަދު ފުރާވަޑައިގަންނަވައިފިއެވެ.
ރައީސް ޑރ.މުއިއްޒުގެ މި ދަތުރުފުޅަކީ އދ އަތޮޅުގެ ރަށްތަކުގެ މީހުން ދިރިއުޅުއްވާ ރަށްތަކަށް ވަޑައިގެން އެއަތޮޅުގެ ރައްޔިތުންނާއި ކައުންސިލްތަކާއި، އަންހެނުންގެ ތަރައްޤިއަށް މަސައްކަތްކުރައްވާ ކޮމީޓީތަކާ ބައްދަލުކޮށް ރަށްރަށުގެ ތަރައްޤިއާ ގުޅުންހުރި ކަންކަމާއި ރައްޔިތުން ބޭނުންވާ ކަންކަމާ ގުޅޭ މައުލޫމާތު ހޯއްދަވައި މަޝްވަރާކުރުމުގެ ބޭނުމުގައި ކުރައްވާ ދަތުރުފުޅެކެވެ.
މި ދަތުރުފުޅުގައި ރައީސް ޑރ.މުއިއްޒު އދ އަތޮޅުގެ 10 ރަށަކަށް ވަޑައިގެންނެވުމަށް ވަނީ ހަމަޖެހިފައެވެ. އެގޮތުން ރައީސްގެ މި ދަތުރުފުޅުގައި ދަނގެތި، ދިގުރަށް، ދިއްދޫ، ފެންފުށި، މާމިގިލި، ހަންޏާމީދޫ، އޮމަދޫ، ކުނބުރުދޫ، މަހިބަދޫގެ އިތުރުން މަންދޫ އަށް ވަޑައިގަތުމަށް ވަނީ ނިންމަވާފައެވެ.
މި ދަތުރުފުޅުގެ ތެރެއިން އެ ރަށްރަށުގެ ތަރައްޤީގެ ބައެއް މަޝްރޫޢުތައް ފައްޓަވައިދެއްވައި އަނެއްބައި މަޝްރޫޢުތަކުގެ ނިމުން ފާހަގަކުރެއްވުން އޮންނާނެއެވެ. ރައީސްގެ މި ދަތުރުފުޅުގައި ދައުލަތުގެ ވަޒީރުންނާއި ކުންފުނިތަކުގެ ބޭފުޅުން ބައިވެރިވެ ވަޑައިގަންނަވައެވެ.
Advertisement
This content is created and paid for by advertisers and does not involve Voice Journalists
