ކުރިއަށް އޮތް ހައްޖު މޫސުމުގައި މީގެކުރިން ދިވެހި ހައްޖާޖީންނަށް ނުލިބޭފަދަ ހިދުމަތްތަކެއް މިފަހަރު ލިބޭނޭކަމަށް ޙައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލް ވިދާޅުވެއްޖެއެވެ.

ހައްޖަށް ތައްޔާރުވުމަށް މިހާރު ކުރެވެމުންދާ މަސައްކަތްތަކާ ގުޅޭގޮތުން ދައުލަތުގެ މީޑިއާ އާ ވާހަކަދައްކަވަމުން ޝަކީލް ވަނީ ކުރިއަށްއޮތް ހައްޖު މޫސުމަށް ތައްޔާރުވުމުގެ މަސައްކަތް ހައްޖު ކޯޕަރޭޝަނުން ފަށާފައިވާކަން ހާމަކޮށްފައެވެ. ޝަކީލް ވިދާޅުވީ ކުރިއަށްއޮތް ހައްޖު މޫސުމަށް ތައްޔާރުވުމުގައި އެކުންފުނިން ފުރަތަމަ ބެލީ ހައްޖަށްދާމީހުންގެ ކަންބޮޑުވުންތަކަށް ކަމަށާއި، އެގޮތުން އެފަރާތްތަކުން އެންމެބޮޑަށް އެދިފައިވާ ކަންކަން ފުރިހަމަ ކޮށްދިނުމުގެ މަސައްކަތް ފަށާފައިވާކަމަށެވެ.

ޝަކީލް ވިދާޅުވީ ހައްޖަށް މީހުން ގެންދިއުމުގެ އުސޫލެއް އެކުލަވާލައި އެ އުސޫލުގެ ދަށުން އަމަލުކުރުމުގެ މަސައްކަތް ފަށާފައިވާކަމަށާއި، މިގޮތުން 2026 ވަނަ އަހަރު ހައްޖަށްދާއިރު، 2021 ފަހުން ހައްޖުވެފައިވާ އެއްވެސް މީހަކު ނުހުންނާނޭކަމަށެވެ. އައު އުސޫލުގައިވާގޮތުން ދެން ހައްޖަށް ދެވޭނީ އެމީހަކު ހައްޖުގެ އަޅުކަން އަދާކުރިތާ ހިޖުރީގޮތުން ފަސްއަހަރުވުމަށް ފަހުގައެވެ.

ކުރިއަށްއޮތް ހައްޖުގައި އުމުރުން ދުވަސްވީ މީހުންނަށް އިސްކަންދިނުމަށް ކެބިނެޓުން ނިންމަވާފައިވާއިރު، 75 އަހަރުން މަތީގެ މީހަކު ހައްޖަށް ދާނަމަ އެމީހަކަށް އެހީތެރިއެއް ގެންދިއުން ވަނީ ލާޒިމްކޮށްފައެވެ. ޝަކީލް ވިދާޅުވީ އެކަމުގައިވެސް ހައްޖަށްދާ ފަރާތުން ބޭނުންވާ ގޮތަށް އެ ފުރުސަތުގެ ބޭނުން ހިފޭނޭކަމަށެވެ. އެގޮތުން ފައިސާ ދައްކައިގެން އެހީތެރިއަކު ގެންދިއުމަށް ބޭނުންނަމަ އެފުރުސަތު އޮންނާނޭކަމަށާއި، ފައިސާ ދައްކަން ދަތިނަމަ، ހައްޖު ކިއުގެ ތެރެއިން މީހަކު ގެންދިއުމުގެ އިހުތިޔާރުވެސް އެބައޮތްކަމަށެވެ. 

ޝަކީލް ވިދާޅުވީ ކުރިއަށްއޮތް ހައްޖު މޫސުމަށް ތައްޔާރުވުމުގެ މަސައްކަތްތައް ކުރަމުން އަންނައިރު، ބައެއް ސަބަބުތަކާ ހެދި ހައްޖަށް ނުދެވޭ ފަރާތްތަކަށް ކިއުގަ ދެން ޖެހިގެން އޮންނަ ފަރާތަށް ފުރުސަތުދީ އެ އިންތިޒާމްތައް މިހާރު ހަމަޖައްސަމުން އަންނަކަމަށެވެ.

މީގެ އިތުރުންވެސް މިދިޔަ ފަހަރުގެ ތަޖުރިބާއަށް ބަލައި ހައްޖާޖީންނަށް ފަސޭހަވާނޭހެން ކަންކަން އިންތިޒާމް ކުރުމަށް މިހާރުން ފެށިގެން މަސައްކަތްތައް ކުރަމުން އަންނަކަމަށް އޭނާ ވަނީ ފާހަގަކުރައްވާފައެވެ.

ހައްޖު ކޯޕަރޭޝަނުން ހައްޖުގެ ކަންކަމަށް ތައްޔާރުވަމުން އަންނައިރު، ސައުދީ ސަރުކާރުން  މި ފަހަކުން ވަނީ ބޮޑެތި ބަލިތައް ހުންނަ މީހުންނަށް ހައްޖުވިސާ ނުދޭން ނިންމާފައެވެ. ޝަކީލް ވިދާޅުވީ އެކަން މިދިޔަ ބްރާސްފަތި ދުވަހު ސަރުކާރަށް އަންގާފައިވާކަމަށާއި، އޭގެ ތެރޭގައި ހިތުގެ ބަލިތަކާއި، ކިޑްނީ އަދި ޑިމެންޝާ ހިމެނޭކަމަށެވެ. ޝަކީލްވިދާޅުވީ ހައްޖަށްދިއުމަށް ފުރުސަތު ލިބޭ ފަރާތްތަކަށް ދުރާލައި މެޑިކަލް ޓެސްޓްތައް ހެދުމަށް އަންގާނެކަން ފާހަގަކުރައްވައި ސައުދީން ވިސާލިބުމުގެ ކަންކަން ހަމަޖައްސަނީ އެ ރިޕޯޓްތަކުގެ ނަތީޖާތަކަށް ބަލައިގެންކަމަށް ވިދާޅިވެފައެވެ.

ރާއްޖެއިން މީހުން ގެންދިއުމުގެ ހުރިހާ އިންތިޒާމްތަކެއް މިހާރު ބަލަހައްޓަމުން އަންނަނީ ސަރުކާރުގެ ހައްޖު ކުންފުނި، ހައްޖު ކޯޕަރޭޝަނުންނެވެ. މީގެ ކުރިން އަމިއްލަ ކުންފުނިތަކުގެ ހަވާލުގައި ހައްޖަށް ދިޔަ މީހުންނަށް ތަފާތު ތަޖުރިބާތައް ކުރެވުނުއިރު، ހައްޖު ކޯޕަރޭޝަނުގެ ހަވާލުގައި ހައްޖަށް މީހުން ގެންދަންފެށިފަހުން ރައްޔިތުންނަށް ވަނީ ވަރަށްބޮޑު އިތުބާރެއް ލިބިފައެވެ. އެކަން އެންެމެބޮޑަށް ފާހަގަވެގެން ގޮސްފައިވަނީ މިދިޔަ ފަހަރުގެ ހައްޖު މޫސުމުގައި ދިވެހި ހައްޖާޖީންނަށް ލިބުނު ހިދުމަތްތަކުންނެވެ.