ޤައުމާއި ރައްޔިތުންނަށް ހެޔޮއެދުމުގެ ނިޔަތެއް އިދިކޮޅުގެ މީހުންގެ ނެތްކަމަށް ހައްޖު ކޯޕަރޭޝަނުގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ރައްޔިތުންނާ ބައްދަލުކުރުމަށް ފަށާފައިވާ ބައްދަލުކުރުންތަކާ ގުޅޭގޮތުން އިދިކޮޅުން ދައްކަމުންގެންދާ ވާހަކަތަކާ ގުޅިގެން އެކްސްގައި ކުރެއްވި ޕޯސްޓެއްގައި ޝަކީލް ވިދާޅުވީ ރައީސް ޑރ.މުއިއްޒު ރައްޔިތުންނާ ބައްދަލުކުރައްވަމުން އެ ގެންދަވަނީ ހެޔޮ ނިޔަތުގައިކަމަށެވެ.
އަދި އެމަނިކުފާނުގެ ސަރުކާރުގެ ތެރެއިން ރައްޔިތުން އެދޭ ކަންކަން ސީދާ ރައްޔިތުންގެ ކިބައިން ދެނެގަނެ އެ ހިދުމަތްތައް ރައްޔިތުންނާ ހަމައަށް ފޯރުކޮށްދިނުމުގެ މާތް މަޤްސަދުގައި ކަމަށެވެ.
ކަން އެގޮތަށް އޮތްނަމަވެސް އިދިކޮޅު ފަރާތްތަކުން ކަމުގެ އަސްލު އޮޅުވާލުމަށް މަސައްކަތް ކުރަމުން އަންނަކަން ޝަކީލް ފާހަގަކުރެއްވިއެވެ. އަދި ރައީސް ކުރައްވަމުން ގެންދަވާ ކަމަކަށް ހުރަސް އެޅޭގޮތަށް އިދިކޮޅު ފަރާތްތަކުން ކުރާ ކަންކަމުން ދޭހަވަނީ އިދިކޮޅު ފަރާތްތަކުން ތިބީ މި ގައުމަށާއި ގައުމުގެ ރައްޔިތުންނަށް ހެވެއް އެދިގެނެއް ނޫންކަމަށްވެސް ޝަކީލް ވިދާޅުވިއެވެ.
ރައީސް ޑރ.މުއިއްޒު ރައްޔިތުންނާ އެކު ބާއްވަވާ ބައްދަލުވުންތައް ސީދާ ރައްޔިތުންގެ ހިޔާލު ހުށަހެޅޭގޮތަށް ބައްދަލުވުންތައް އިންތިޒާމުކޮށްގެން ކުރިއަށްގެންދިޔަ ނަމަވެސް އިދިކޮޅުންދަނީ އެ ބައްދަލުވުންތަކަށް ފާޑުކިޔަމުންނެވެ. އެގޮތުން ބައްދަލުވުމުގައި ސުވާލުކުރަނީ ސަރުކާރުން ދޭ ސުވާލުތައް ކަމަށްވެސް އިދިކޮޅުން ދަނީ ތުހުމަތު ކުރަމުންނެވެ.
Advertisement
This content is created and paid for by advertisers and does not involve Voice Journalists
