ދިވެހި ބޮޑު ކަންނެލި މަސްވެރިންގެ ކަންބޮޑުވުންތައް ހިއްސާ ކުރުމަށް ކަންނެލި ދޯނިތަކުން ކުރަމުންދިޔަ މުޒާހަރާގައި ބައިވެރިވި ބިދޭސީންތަކެއް ފުލުހުންނަށް އައުގުރާނު ގޮވައިފިއެވެ. 

އެގޮތުން، އިހްތިޖާޖުގައި ބައިވެރިވި ބިދޭސީން ފުލުހުންނަށް އައުގުރާނަ ގޮވާ ވީޑިއޯއެއް ދޯނީގައި ހުރި ބިދޭސީއަކު މިއަދު އާއްމުކޮށްފައިވެއެވެ. އެ ވީޑިއޯގައި، ދޯނީގައި ހުރި ބިދޭސީ މީހާ، ފުލުހުންނަކީ ނަ… ކަމަށް ބުނެ ހަޑިހުތުރު ބަހުން އައުގުރާނަ ގޮވާފައިވާއިރު، އޭނާގެ ފަހަތުގައި ތިބި ބިދޭސީންތައްވެސް ވަނީ އޭނާއަށް އެއްބާރުލުންދީ ހުތުރުބަސްތައް ބޭނުންކޮށްފައެވެ. 

މި އަހަރުގެ މަސްވެރިންގެ ދުވަހާ ގުޅުވައި ބޮޑު ކަންނެލި މަސްވެެރިންގެ ޔޫނިއަނުން 49 ދޯންޏާއެކު މި އިހްތިޖާޖު ފެށީ އިއްޔެ ހެނދުނު 9:30 ގައި ހުޅުމާލެ ކަންނެލި ޖެޓީގަ އެވެ.

މިއީ ބޮޑު ކަންނެލި މަސްވެރިކަމުގައި ހުރި ކަންބޮޑުވުންތައް ސަރުކާރައް އިއްވައި، އެ ފަރާތްތަކުގެ ޑިމާންޑްތައް ސަރުކާރަށް އެނގުމުގެ ގޮތުން ފެށުނު އިހްތިޖާޖެއް ކަމަށް އިހްތިޖާޖުގައި ބައިވެރިވި މަސްވެރިން ބުނެފައިވެއެވެ.

ހުޅުމާލޭ ކަންނެލިޖެޓީން ފެށި މި އިހްތިޖާޖުގެ ދޯނިތައް މާލޭގެ ފަޅަށް ވަންނަން މަސައްކަތް ކުރުމުން ދޯނިތަކަށް ނުވަދެވޭ ގޮތަށް ފުލުހުންނާ އެމްއެންޑީއެފްގެ ކޯސްޓްގާޑުން ވަނީ ނެރު ބަންދު ކޮށްފަ އެވެ. އެހެންކަމުން ދޯނިތައް އިހްތިޖާޖު ކުރަމުން ދިޔައީ ފަޅުން ބޭރުގައެވެ. 

މި އިހްތިޖާޖުގައި ބައިވެރިވި ބައެއް ދޯނި ތަކުގައި ބިދޭސީންވެސް ހަރަކާތްތެރިވަމުންދިޔަ ކަމަށް ފުލުހުން މިއަދު ވަނީ ބުނެފައެވެ. އެގޮތުން، ފުލުހުން ބުނީ އިހްތިޖާޖުގައި ބިދޭސީން ބައިވެރިވަމުންދާކަން ފާހަގަކުރެވުމާއެކު، އެކަން އެގޮތަށް ނުކުރުމަށް ނަސޭހަތްތެރިވިކަމަށެވެ.

އަދި، އެދޯނިތަކުގައި މަސައްކަތްކުރާ ބިދޭސީންނާ ގުޅޭ މައުލޫމާތު ހޯދުމަށްޓަކައި ފުލުހުންނާއި އިމިގްރޭޝަން ގުޅިގެން މަސައްކަތްކުރަމުންދާ ކަމަށާ އިހުތިޖާޖުގައި ބިދޭސީން ހަރަކާތްތެރިވާކަމަށް ފާހަގަކުރެވިފައިވާ ދޯނިތަކަށްވެސް ފުލުހުން އަރާފައިވާ ކަމަށް ބުނެފައިވެއެވެ.