އިދިކޮޅުން މަސައްކަތް ކުރަނީ ރައްޔިތުންގެ މަސްލަހަތާ ދެކޮޅަށް: ޝަކީލް
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމާ ގުޅޭގޮތުން އިދިކޮޅު ފަރާތްތަކުން ދައްކަމުންދާ ވާހަކަތަކަށް މޯލްޑިވްސް ޙައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ފާޑުވިދާޅުވެއްޖެއެވެ.
ޝަކީލް އެކްސްގައި ކުރެއްވި ޕޯސްޓެއްގައި ވިދާޅުވީ، މި ގައުމުގައި މީގެ ކުރިން ވެރިކަން ކުރެއްވި ހުރިހާ ވެރިންވެސް ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމަށް މީގެ ކުރިން ތާއީދުކޮށް ވަކާލާތު ކުރައްވާފައިވާ ކަމަށެވެ.
ނަމަވެސް، މިއަދު އިދިކޮޅުގައި ތިއްބަވައިގެން ޕޯޑިއަމްތަކަށް އަރާ މިކަމަށް ދެކޮޅު ހަދަމުންދަނީ ގައުމާމެދު އެއްވެސް އިހުލާސްތެރިކަމެއް ނެތީމަ ކަމަށް އޭނާ ތުހުމަތު ކުރެއްވިއެވެ.
”ސިޔާސީ ފިކުރަށްވުރެ ގައުމު އިސްކުރަންޖެހޭ މިހާލަތުގައިވެސް އިދިކޮޅުން މަސައްކަތް ކުރަމުން އެދަނީ ރައްޔިތުންގެ މަސްލަހަތާ ދެކޮޅަށެވެ.“ ޝަކީލް ވިދާޅުވިއެވެ.
ޝަކީލް މިހެން ވިދާޅުވެފައިވާއިރު ކުރީގެ ރައީސް މުޙައްމަދު ނަޝީދު އާއި ރައީސް އިބްރާހިމް މުޙައްމަދު ޞާލިޙްވެސް ދެ އިންތިޚާބު އެއް ދުވަހެއްގައި ބޭއްވުމަށް ތާއީދު ކުރައްވައި މީގެ ކުރިން ވާހަކަދައްކަވާފައިވާކަން ފާހަގަކޮށްލަންޖެހެއެވެ.
ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމާ މެދު ރައްޔިތުންގެ ފެންނަ ނުފެންނަ ވޯޓެއް ނެގުމަށް ހަމަޖެހިފައިވަނީ އަންނަ އޭޕްރީލް މަހުގެ 4 ވަނަ ދުވަހުއެވެ. މި ވޯޓު ނެގުން ކުރިއަށްދާނީ އެ ދުވަހު ބޭއްވުމަށް ތާވަލުކޮށްފައިވާ ލޯކަލް ކައުންސިލް އިންތިޚާބާ އެކުގައެވެ.
Advertisement
This content is created and paid for by advertisers and does not involve Voice Journalists
